Laing kontrobersiya na usab ang nihamok sa Cebu City Medical Center (CCMC) nga sukad gideklarar ang building nga peligro na human miigo ang 7.2 magnitude nga linog niadtong 2013, hangtod ning higayona wa pa mahingpit ang katukoran sa bag-o. Minilyon nga pundo ang giaprobahan sa Dakbayan sa Sugbo sud sa tulo ka higayon, diin nagkalainlain nang mga kontraktor ang nalambigit. Mokantidad og P567 milyones ang unang giaprobahan nga pundo alang sa pagtukod sa unom ka andana unya gidugangan og P283 milyones alang sa utilities nga maoy Phase 2. Nadugangan og laing P100 milyones alang sa Phase 3.
Abril ning tuiga giaprobahan ang P908 milyones nga pundo alang sa Phase 4 nga nagagikan sa ikapito ngadto sa ika-10 nga andana, lakip ang sud nga bahin sa ikatulo ug ika-upat nga andana. Gikataho nga dunay nabuhat ang kasamtangang kontraktor sa ikatulo ug ikaupat nga andana apan way kalambuan gikan sa ikapitong andana pataas nga maoy hangyo ni Mayor Michael Rama, nga anaa na ang istruktura hangtod sa ika-10 nga andana atol sa iyang adlawng natawhan sa milabayng buwan.
Bisan sa pasalig sa kontraktor nga mahitabo apan niadtong Hulyo daw sa may sinyales na nga di nila mahatag ang gusto ni Rama kay nakakita sila og depekto sa pundasyon sa building ug gikinahanglang adunay pagahimuon nga engineering study. Masabtan nato ang pagpaundang ni Rama sa trabaho sa CCMC kay angay nang matutokan ang serbisyo ug programa sa panglawas sa mga lumolupyo sa dakbayan ilabi nang tinguha niini nga mahimo nang Level 3 ang tambalanan.
Ning kalisod nga atong nasinati karon, ubanan sa problema sa panglawas, mas maayo nga naay tambalanan nga maghatag og serbisyo nga mogaan ang atong pamati bisan pa sa atong kapobrehon. Di na angay langayon pa ang pagkompleto sa CCMC kay gawas naay pundo, duna man gani mga negusyante nga andam nga motabang aron mahuman na kini ug matagamtaman na ang serbisyo ug diyotay ra ang atong makuot sa bulsa kay lakip man kini sa batakang serbisyo sa kagamhanan. (josephelvirtubilan@gmail.com)