Aron mokunhod ug masumpo ang pagkatap sa illegal nga drugas ug uban pang mga kontrabando sa Sugbo, giumol sa Kagamhanan sa Probinsya sa Sugbo ang gitawag og One Cebu Inter-Agency Interdiction Task Force (OC-IATF) nga maoy motutok ug mopatuman sa mga lagda niini.
Sa Nobiyembre 14, 2022, nagtigum ang mga opisyal sa kapulisan, Philippine Drug Enforcement Agency, Coast Guard, Philippine Army, mga opisyal sa airport ug ports, kadagkoan sa tri-cities ug mga dakbayan sa Probinsya, lakip na ang uban pa’ng concerned agencies, aron hisgutan ang mga lakang subay sa tinguha nga “all-out war” batok illegal nga drugas sa Sugbo.
Si Brigadier General Roderick Alba, direktor sa Police Regional Office (PRO) sa Central Visayas, unang nipresentar sa task force ug sa mga kaubang ahensya nga ikatambayayong sa programa.
“Napag-usapan doon how to have a holistic approach that well, masasabi natin, na ma involved lahat ng mga agencies including our local government units. Lahat ng mga stakeholders to support the program of the governor on the campaign against illegal drugs...Ang concept nito it will be One Cebu Inter Agency Interdiction Task Force focusing on the security of our borders particularly ang airports and seaports dahil basically iyan po ang mga reports minsan nakikita natin na dinadaanan ng mga contrabands,” matod ni Alba sa interbyu sa mga tigbalita sa Nobiyembre 14.
Ang mangulo o overseer sa task group mao si Cebu Governor Gwendolyn Garcia, kauban ang regional directors sa PDEA ug Philippine National Police sa rehiyon.
Gawas niini, adunay upat ka mga grupo nga motutok sa mga airport, seaports, may mag monitor ug may support service nga motuki sa legal nga bahin sa mga kaso unya nga isang-at batok sa mga madakpan.
Sa pagkakaron, ipaubos pa sa dugang pagsusi ang mga lagda nga ilakip sa Memorandum of Agreement (MOA) o kasabutan nga gikatakdang pirmahan sa dili pa matapos ang Nobiyembre.
SUPPLY SA DRUGS
Gihimug-atan ni Garcia nga subay sa maong programa, unahon ang ‘supply reduction’ ug ‘demand reduction’ sa illegal nga drugas.
Isunod ang pagpahamtang og silot sa mga sad-an.
Giawhag niya ang tanan nga mga mayor sa lalawigan sa Sugbo nga mohatag sa ilang suporta sa programa sanglit dili lang kini usa ka higayon nga pamaagi, apan nagtinguha usab ang gobernador nga ang pakigbatok sa illegal nga drugas ug ubang illegal nga kalihukan mahimo unya nga kabahin sa pagpuyo sa matag Sugboanon.
“We wish to send that signal that this is not just a one time thing, this will become a way of life for all of us Cebuanos. For all agencies this will now become intrinsic into our culture, into our system, this uncompromising position against illegal drugs that we will never let up in this all-out war against illegal drugs,”matod ni Garcia.
Gibauran ni Garcia ang mga ilegalista nga dili hugawhugawan ang Sugbo sanglit tinud-on sa kagamhanan ug sa mga awtoridad ang pagpatuman sa balaud ug sa maong programa aron malikayan ang pagdaghan niini.