Subay sa hingpit na nga pagpatuman sa face-to-face (f2f) classes sa pampubliko nga tunghaan sa nasod, nagkadaiyang mga pagpangandam ang gihimo sa gobiyerno ug pribado nga kompaniya aron matabangan nga andam ang mga tunghaan niini.
Gani, usa ka pribado nga kompaniya sa Sugbo ang mitabang sa 113 ka pampubliko nga tunghaan isip parte sa ilahang Brigada Eskwela Program.
Ang Visayan Electric nitunol og hinabang ngadto sa 113 ka public schools sulod sa franchise area niini aron maandam sa pagbalik sa klase sa mga tunghaan.
Inubanan sa Aboitiz Foundation ug Vivant Foundation Inc., ang Visayan Electric mitunol og hinabang nga ceiling ug exhaust fans, TVs, new school signages, tents ug mi-upgrade usab sa electrical wirings niini nga public elementary schools.
“Your program is the answered prayers of our schools,” matod ni Consolacion Public Schools District Supervisor, Raul Jumao-as sa iyahang mensahe atol sa turnover ceremony sa rewired electrical system sa Polog Elementary School.
Nasayran nga ang Polog Elementary School aduna la’y pito ka magtutudlo ug 230 ka mga estudyante nga anaa mahimutang sa bukirang bahin sa Consolacion.
Gibutangan usab sa Veco og dako nga signage ang maong tunghaan aron dali na kini mailhan nga usa ka tunghaan.
“Nalipay ko kay gitubag sa Visayan Electric ang atong kinahanglan,” matod ni Jumao-as.
Mapasalamaton usab si Dr. Venus Pepito, school principal sa tunghaan tungod kay nasulbad na ang ilahang dako nga problema , “Kadtong bag-o palang ko na assign diri last December 2021, ang pinakauna nakong nakita ang problema sa wiring, pero nalipay kaayo ko kay na address sa Visayan Electric in less than a year.”
Laing tunghaan nga nakabenepisyo sa programa sa Visayan Electric ang Mangabon Elementary School nga anaa mahimutang sa Tagba-o, bukirang barangay sa dakbayan sa Sugbo.
Ang Visayan Electric ug Vivant Foundation Inc., mihatag og Smart TV, exhaust fans, ug industrial wall fans alang sa maong tunghaan.
Si Quennie Bronce, Reputation Enhancement Manager sa Visayan Electric, nihatag og bili sa ka kaimportante sa partnership sa Visayan Electric ug sa Department of Education (DepEd).
“We at Visayan Electric care for the safety of students and teachers, especially in schools located within our franchise area. We are committed to helping these schools get ready for face to face classes to give teachers and students the tools they need and to provide an environment that is conducive to learning,” si Bronce nagkanayon. (HBL with PR)