Mga duwa karon: Nov 6, 2022
3:00 pm- Talk N’ Text batok Meralco
5:45 pm- Magnolia batok San Miguel
Pormal nga pagsulod sa quarter-finals maoy tinguha sa Magnolia Chicken Timplados Hotshots sa ilang pagpakigbatok sa San Miguel Beermen sa main game karong hapon, Nobiyembre 16, 2022, sa Philippine Basketball Association (PBA) Commissioner’s Cup sa Smart Araneta Coliseum.
Ang Hotshots kasamtangang nagpatong sa solong liderato dala ang 7-1 nga rekord apan nagkinahanglan pa sila og usa ka daog aron makaseguro og puwesto sa playoffs.
Sa ilang bahin, ang Beermen naa sa delikadong kahimtang bitbit ang 3-4 nga rekord nga kasamtangang nagpahiluna kanila sa ikawalo.
Kon mapilde ang Beermen, hayan motidlom og samot ang ilang poruhan nga makakumpayot og puwesto sa magic eight.
Grabe ang panghinaot sa Beermen nga makasulod sa quarter-finals gumikan kay ning panahuna, gibanabanang makabalik na ang duha sa ilang mga sinaligan nga sila si JuneMar Fajardo ug Terrence Romeo.
Sa premirong duwa, magsangka ang Talk N’ Text (TNT) KaTropa ug Meralco Bolts sugod karong alas 3:00 sa hapon.
Ang KaTropa naa sa ikapitong puwesto dala ang 4-4 nga rekord samtang ang Bolts naa sa ika-10 nga adunay 3-5 nga baraha.
Ning puntoha, grabe ka mahinungdanon ang nahabiling mga tahas sa duha ka mga kampo. (ESL)