Kapulisan sa Central Visayas nagpahimangno sa publiko nga magmabinantayon sa mga kriminal sa internet ug ATM machines aron dili mabiktima sa mga scheming device ning nagkaduol na ang Pasko.
Gipanglantawan sa kapulisan nga mosiaw na usab ang mga kawatan nga mamiktima sa inosente nga mga tawo.
Matod ni Police Brigadier General Roderick Augustus Alba, hepe sa Police Regional Office 7 (PRO 7) nga kinahanglan nga magbantay ang publiko sa mga modus sa mga kriminal sanglit sa panahon sa Pasko, mangita kini og paagi nga dunay makuha nga dakong kantidad sa laing tawo.
Kasagaran sa pamiktimahon mga tawo nga mang-withdraw sa ATM machines busa kinahanglan nga proteksyonan ang mga pin number ug account number sa bangko aron dili masayran sa laing tawo.
Dugang ni Alba nga ang kapulisan sa Central Visayas mopalig-on pa sa ilang kampanya batok sa pagpangilad usab sa online pinaagi sa abag sa laing unit sa PNP sama sa Anti-Cyber Crime Unit sa pakig-alayon sa bank managers aron mabatokan ang nagkalainlaing matang sa scam.
Sa mosunod nga mga adlaw, matod ni Alba nga kinahanglan nga ang mga pulis makita na sa kadalanan aron mapugngan ang krimen nga mahitabo sa matag lugar.
Patutokan niya ang shopping malls ug ATM machines nga maoy adtuon sa mga tawo.
“Police presence reduce crimes. So in the coming days more policemen will be seen in the streets near establishments to reduce the threats of crime,” matod ni Alba.
Ilang ipatuman ang broken windows theory nga gihimo sa nanglabay nga mga chief PNP.