Mga duwa karon: Nov. 17, 2022
5:15 pm- USJ-R batok USPF (High School)
6:45 pm- UV batok USPF (College)
Suwayan paglangkat sa University of the Visayas (UV) Green Lancers ang ikawalo nilang sunodsunod nga kadaugan sa samang gidaghanon nga mga duwa sa ilang pagpakigbatok og balik sa University of Southern Philippines Foundation (USPF) Panthers sa main game karong gabii, Nobiyembre 17, 2022, sa Cebu Schools Athletic Foundation Inc. (CESAFI) college basketball sa Cebu Coliseum.
Sa premirong panagsangka sa duha ka mga kampo niadtong Oktubre 22, 2022, gipangmakmak sa Green Lancers ang Panthers, 86-68.
Dili ikalimod nga grabe ka inilog ang Green Lancers ning sangkaa apan ning higayuna, gilauman nga makahatag na og mas hugot nga kombati ang Panthers, nga adunay 5-3 nga rekord.
Sa premirong duwa, magsangka ang USPF Baby Panthers ug University of San Jose Recoletos (USJ-R) Baby Jaguars sa high school division sugod sa alas 5:15 sa hapon.
Sa laing bahin, gipangpukan sa University of San Carlos (USC) Warriors ang Cebu Institute of Technology-University Wildcats pinaagi sa overtime, 79-70, sa college division niadtong Nobiyembre 15, 2022 sa gabii.
Sa laing duwa, gipanglampornas a City of Bogo Science and Arts Academy (CBSAA) Trailblazers ang USC Baby Warriors, 71-52, sa high school category.