Kontraktor, Cebu City mo-terminate sa kontrata

CCMC BUILDING: Ang bag-ong edipisyo sa Cebu City Medical Center (CCMC) sa eskina sa dalan Panga­niban ug N. Bacalso Ave. sa Brgy. Pahina Central wala hingpit natapos sa pagkakaron tungod sa pagtumaw sa daghang isyu. / SunStar File
CCMC BUILDING: Ang bag-ong edipisyo sa Cebu City Medical Center (CCMC) sa eskina sa dalan Panga­niban ug N. Bacalso Ave. sa Brgy. Pahina Central wala hingpit natapos sa pagkakaron tungod sa pagtumaw sa daghang isyu. / SunStar File

Ang Cebu City Government ug pribadong contractor sa Cebu City Medical Center nagkasabot na sa “gentlemen’s agreement” sa pag-terminate sa kontrata sa pagtukod sa tambalanan.

Si Atty. Collin Rosell, executive secretary ni Mayor Michael Rama, niingon sa Miyerkules, Nobiyembre 16, 2022, nga ang Kagamhanan sa Dakbayan nagpahigayon na sa kwentada kon pila ang mabayran sa kontraktor sa trabaho nga ilang nahimo hangtod karon.

Matod ni Rosell nga si Rama ug si Michael Sicat sa M.E. Sicat Construction ninghisgot na ug uyon sa mutual cessation sa P908 milyunes nga kontrata sa phase 4 sa CCMC project.

Si Atty. Jerone Castillo, special assistant ni Rama sa mga proyekto, niingon nga tukion na sa Dakbayan ang ubang pamaagi nga magamit sa dakbayan sa pagtukod sa CCMC nga dili magsalig sa procurement law sa kagamhanan.

Apil na niini ang posibilidad nga humanon ang konstruksyon pinaagi sa public-private partnership, dugang niya.

Sila si Rosell ug Castillo nipasabot nga susama sa duha ka medium-rise buildings (MRBs) sa Barangay Lorega nga gitukod alang sa informal settlers, ang sunod nga kontraktor maoy mopadayon sa pagtukod sa CCMC ug itugyan ang proyekto ngadto sa Cebu City Government kon mahuman na.

Ang mga MRB sa Lorega gitukod sa Cebu Landmasters Inc. isip kabahin sa pagtuman sa kompaniya sa gikinahanglan nga balanse nga Housing Development Program ubos sa Urban Development and Housing Act of 1992.

“We will explore these modalities and we will recommend to the mayor what is best so that this project will really be performed and executed according to his commitment to the people of Cebu,” matud ni Castillo.

KALANGAY

Si Assistant City Engineer Lowell Corminal niingon nga ang M.E. Sicat Construction nakaangkon na og 11.72% nga negatibo nga pagkalangan sa mga construction work sukad sa Oktubre 2022.

Giklaro ni Corminal nga posibleng mosaka pa ang maong porsiyento sanglit ang city engineers nagpahigayon pa og dugang ebalwasyon aron ma-reconcile ang aktuwal nga accomplishment ug giplanohan nga accomplishment.

Gipasabot usab niya nga sa higayon nga ang usa ka kontraktor makarehistro og singko porsiyento nga negatibong slippage, ang procuring entity mopagawas sa ilang unang pasidaan ug kataposang pahimangno kon moabot na sa 10 porsiyento ang slippage.

Sa higayon nga ang negatibo nga slippage mosaka pa sa 15 porsiyento, ang procuring entity mahimo nang adunay katungod sa pagtapos sa kontrata.

Ang negative slippage kay sumadahon base sa aktuwal nga accomplishment sa kontraktor gikan sa giplano nga accomplishment nga gisumite ug giaprobahan sa kontraktor ug sa Department of Engineering and Public Works, matod ni Engineer Danny Urot ang project manager sa CCMC.

KALIG-ON

Ang pribadong kontraktor sa proyekto niingon nga wala pa sila makasugod pagtrabaho sa structural works paingon sa ikawalong andana sanglit ang ilang mga arkitekto ug mga enhinyero nagpahigayon pa og inspeksyon sa kalig-on sa pundasyon sa CCMC, tungod kay dili sila ang nagtukod sa ubos nga andana sa ospital.

Si Corminal niingon nga ang kontraktor nakasumite na sa ilang preliminary findings sa structural investigation nga ilang gihimo.

Hinuon, gikuwestiyon sa DEPW ang findings sa kontraktor tungod kay wala kini pirmahi ug selyado aron masuta ang pagkatinuod niini, dugang ni Corominal.

NAGASTO

Kapin na sa P1 bilyon ang ang nagasto sa Cebu City Government alang sa katukoran sa bag-ong CCMC.

Ang kinatibuk-ang gahin niabot na og dul-an sa P2 bilyunes.

Ang kantidad nga nagasto naglakip sa P566.085 milyones alang sa Phase 1 sa proyekto nga gihimo sa C.E Padilla Construction Inc., P36.33 milyones sa Phase 1.1 nga gihatag ngadto sa Charlz Construction, P299 milyones sa Phase 2 nga gihatag ngadto sa C.E. Padilla, ug Ang Phase 3 nga nagkantidad og P99.72 milyones nga napunta sa C.B. Garay Philwide Builders.

Ang Phase 4 sa proyekto nga nagkantidad og P907.99 milyones nga gidaug sa M.E Sicat Construction Inc., nga nahimong kontrobersyal human gipahibalo ni Rama niadtong Nobiyembre 9, 2022 ang pagtapos sa kontrata sa kontraktor.

Alang sa phase 4, ang City Government, nipagawas na og 15 porsiyento sa kontrata o P136,199,980 isip partial payment sa M.E. Sicat, dugang niya.(IRT, PAC, TPT)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph