Mag-atubang og kaso ang drayber sa sakyanan nga gikatahong ni-hit and run sa usa ka tinun-an sa high school sa pedestrian lane sa Barangay Basak, dakbayan sa Lapu-Lapu sa Martes sa hapon, Nobiyembre 15, 2022.
Si Police Major Karen Bangkoleta, hepe sa Lapu-Lapu City Police Station 4, nitug-an sa SunStar Cebu nga nakuha na nila ang plate number sa four-wheeled nga sakyanan pinaagi sa closed-circuit television (CCTV) footage duol sa dapit diin nahitabo ang insidente.
Hinuon, si Bangkoleta niingon nga ila kining iduso ngadto sa Land Transportation Office (LTO), ug midugang nga kini ubos pa sa enhancement verification.
Matod niya nga mag-atubang gihapon og kaso ang drayber bisan buhi pa ang Grade 8 student.
Si Bangkoleta niingon nga ang inahan nga giilang si Cherry Mae Fuentes Pelayo nangayo na og tabang sa kapulisan sa Miyerkules, Nobiyembre 16, ug andam nga mopasaka og kaso batok sa suspek nga pabiling wala mailhi.
Matod niya nga posibleng mag-atubang og kasong reckless imprudence resulting to physical injury ang drayber ug sa Sec. 55 sa Republic Act (RA) 4136 kun Land Transportation and Traffic Code.
Apan gihimug-atan ni Bangkoleta nga maghuwat pa sila sa medical result sa tinun-an nga gipaubos sa medical checkup.
Aron malikayan ang susamang insidente, gipahinumdoman sa hepe sa kapulisan ang mga drayber nga responsable sa pagmaneho, ilabina sa Barangay Basak nga sagad makasinati og grabeng trapiko.
“Pag nag-drive ta, dapat naka-focus gyud ta kay naa gyud tawn tawo sa lugar nga naay mga estudyante, so mag-ingat gyud,” matod niya, ug midugang nga kinahanglang likayan sa mga drayber ang bisan unsang distraction sama sa cell phone.
Sa laing bahin, giawhag ni Lapu-Lapu City Mayor Junard “Ahong” Chan ang publiko nga i-report ang bisan unsang impormasyon kalabot sa drayber nga nisibat human nakabangga sa estudyante.
“Di makiangayon ning gibuhat sa driver nga mi-hit and run sa inosenteng bata nga mitabok sa sakto nga pedestrian lane. Palihug sa pagreport sa akong opisina kon nakasaksi kamo sa maong hitabo ug nakahinumdom kamo sa plate number sa maong sakyanan,” matod ni Chan sa iyang social media post. (MKG)