Nipasar sa ikatulo ug kataposang pagbasa ang ordinansa nga nagtumong sa pag-regulate sa dispensing ug ang pagbaligya sa pharmaceutical products sa sari-sari stores ug ubang susamang outlets sa dakbayan sa Mandaue.
Si City Councilor Joel Seno, usa sa mga tagsulat sa ordinansa, nitug-an sa SunStar Cebu niadtong Martes, Nobiyembre 15, 2022, nga naaprobahan kini atol sa regular session sa Konseho sa dakbayan niadtong Lunes, Nobiyembre 14.
“Naghuwat na ta nga pirmahan ni Mayor Jonas Cortes, ug ipatuman dayon kini,” matud ni Seno.
Dugang ni Seno nga kauban niya nga nagsulat sa balaod uban ni City Councilor ug chairman sa committee on health Nerissa Soon-Ruiz nga nagtinguha nga mahatagan ang mga kabus og dugang access sa mga batakang tambal sama sa mga remedyo sa balay.
Gihisgotan ni Soon-Ruiz kaniadto nga ang lakang nagtinguha nga masiguro nga ang mga tindahan nga dili pharmacy dili mamaligya og mga peke nga over-the-counter (OTC) nga antibiotic nga mga tambal.
Gikutlo usab niya nga daghang mga tawo ang kanunay nga nagtambal sa kaugalingon ug nagkuha sa over-the-counter nga antibiotics, nga iyang gitataw nga kon wala’y husto nga resita, mahimong makadaot imbes makaayo.
Apan gisubli ni Soon-Ruiz nga ang ordinansa dili direktang nagsuspinde apan nagmonitor sa pagbaligya sa mga tambal sa mga retail store.
Giklaro usab ni Seno nga ang sari-sari stores ug uban pang susamang retail outlets ug micro-enterprises gitugotan sa pag-dispense, o pagbaligya og mga tambal gawas sa resita ug pharmacist-only OTC nga mga tambal.
Sa nalatid sa ordinansa, ang City Health Office (CHO) kinahanglang magmugna og task force nga mo-monitor sa non-pharmaceutical stores.
Gitahasan usab ang mga barangay sa pagtabang sa City Government pinaagi sa pagpahigayon og Information, Education, and Communication (IEC) alang sa mga tag-iya sa tindahan sa ilang tagsa-tagsa ka komunidad, pag-integrate ug pag-regulate sa ilang mga barangay permit, ug pagtaho sa mga malapason sa awtoridad.
Ang mga retail store nga madakpan nga namaligya og peke nga mga tambal magbayad og multa gikan sa P1,000 ngadto sa P5,000 ug pagkapriso sulod sa unom ka bulan ngadto sa usa ka tuig subay sa Section 45 sa Republic Act 10918, o naila nga Philippine Pharmacy Act, ang balaod nag-ingon.