Way klase sa tanang lebel sa tanang pampublikong tunghaan sa dakbayan sa Lapu-Lapu ug way trabaho sa Kagamhanan sa Dakbayan sa Lunes, Nobiyembre 21, 2022.
Si Lapu-Lapu City Mayor Junard “Ahong” Chan niisyu niadtong Miyerkules, Nobiyembre 16 og Executive Order No. 2022-58 nga nagsuspenso sa mga klase ug trabaho kay piyesta sa Birhen sa Regla.
Ang pagsuspenso sa klase naglakip sa Lapu-Lapu City College. Gitugyan hinuon ni Chan ang pagbuot sa pagsuspenso sa klase sa school management sa mga pribadong tunghaan sa dakbayan.
Gitataw ni Chan nga kini ang unang higayon sulod sa tulo ka tuig nga lainlaing mga kalihokan ang gipahigayon tungod sa pag-relax o paglibkas sa mga health protocol tungod sa coronavirus disease (Covid-19) pandemic.
Matod niya nga gipaabot nga ang pagdagsa sa mga deboto ug bisita sa dakbayan mahimong hinungdan sa kahuot sa trapiko, kalisod sa kasakyan ug makahasol sa pag-adto ug pag-uli gikan sa eskwelahan.
“There is a need to implement measures to minimize the possible inconvenience expected with a surge of devotees and visitors, protect health and well-being of all residents, and ensure the safety of all who will attend the activities,” mabasa sa EO.
Hinuon giklaro sa mayor nga kinahanglang ipahigayon ang make up classes pagkahuman aron makompleto ang gidaghanon sa mga adlaw sa tigtungha nga gitakda sa Department of Education (DepEd) ug Commission on Higher Education (CHED).
Samtang, ang mga opisina nga adunay frontline services sama sa City Treasurers Office (CTO), Office of the Building Officials (OBO), City Health Office (CHO), City Planning and Development Office (CPDO), ug BOSS, kinahanglang adunay skeletal force nga modumala aron makadawat og mga bayad o aplikasyon.
Gipasabot usab sa mayor nga ang pagsuspenso sa trabaho wala maglakip sa mga opisina nga nalambigit sa emergency response, pagmentinar sa kalinaw ug kahusay, pagdumala sa trapiko, pagdumala sa solid waste, serbisyo sa ospital, ug clean and green services.
Gihatagan usab ni Chan og gahum ang mga tagdumala sa mga establisemento nga suspindihon ang trabaho sa pribadong negosyo ug mga ahensya sa nasudnong gobiyerno sa siyudad sa maong adlaw sa pagdumala.