Gitan-aw sa Cebu City Police Office (CCPO) ang duha ka posibleng lead nga mosangko sa pag-ila sa responsable sa pagdunggab kang “Bonbon” sa iro niadtong Nobiyembre 6, 2022.
Nitumaw nga posibleng bata ang nidunggab sa iro base sa sulti sa laing bata.
Si City Councilor Phillip Zafra, chairman sa committee on peace and order, nitug-an sa SunStar Cebu sa Huwebes, Nobiyembre 17, nga sa inisyal nga report gikan sa CCPO, nasayran nga posibleng usa ka menor de edad ang nibutang sa kutsilyo sa ulo sa saag nga iro.
Apan si Zafra niingon nga nakadawat siya og laing taho nga nagtug-an nga usa ka hamtong nga lalaki nga residente sa Barangay Bonbon ang responsable.
Sa kaso sa menor de edad, ang konsehal niingon nga pipila ka gutlo sa wala pa madiskubre ang iro, usa ka 11-anyos nga batang lalaki ang nakit-an sa laing menor de edad nga nagkupot sa kutsilyo nga sa ulahi nakit-an nga nitaup sa ulo sa iro. Apan wala nay dugang impormasyon nga makasuporta sa maong alegasyon, matod niya.
“Ang CCPO molawom pa sa ilang imbestigasyon tungod kay, sumala niini, nakadawat og impormasyon ang kapulisan nga adunay bata nga nakakita sa 11 anyos nga batang lalaki nga nagkupot sa kutsilyo apan walay nakakita sa bata nga mibutang sa kutsilyo sa ulo sa iro,” matod ni Zafra sa Cebuano.