GIKONSIDERANG usa sa mga labing unang higayon nga pinakadako nga baha ang nasinati sa munisipalidad sa Sta. Maria, Davao Occidental gikan dekada 80.
Gisaysay ni Rosalina Diaz Maldin, 62, taga Barangay Pong-Pong, nga kini ang pinakadako nga baha nga ilang nasinati.
"Lumad man gyud ko diri, kini ang unang higayon, pero gyud kadako sa baha, mora ba nga natigom ang tubig unya midagayday sa ubos nga bahin," saysay sa 62-anyos nga tribong Tagakaulo.
Alas 7 pa sa gabii, Miyerkules, Nobyembre 16, 2022, nagsugod na ang pagbunok sa ulan dala sa inter-tropical convergence zone (ITCZ) nga nakaapekto sa dakong bahin sa Mindanao.
Pagkakaadlawon, Huwebes, Nobyembre 17, mikalit og kusog ang bul-og sa tubig sa mga kasapaan nga mikutay sa mga ubos nga bahin sa Poblacion sa Sta. Maria.
Gilayong nangbakwit ang mga residente sa taas nga bahin, diin sa kakusog sa tubig baha, gianod niini ang responder truck sa Bureau of Fire Protection Sta. Maria.
Sa kadako sa tubig baha, gilayong mipagula og executive order si Sta. Maria Mayor Claude Benjamin II D. Bautista alang sa suspension sa tanang klase sa tanang levels sa public ug private schools ug suspensyon sa trabaho sa government offices sa nasampit nga munisipalidad.
Sa samang paagi, nagdeklara sab ang Magsaysay, Davao del Sur og suspension of classes ingon man ang mga kasikbit nga dapit niini human nga gilunopan sab sama sa Sulop ug sa Kiblawan, Davao del Sur.
Gikonsidera sa awtoridad nga usa kini ka regionwide nga pagbaha, ug kasamtangang nanghatud na sa mga ayuda sama sa pagkaon ug gamit sa mga apektadong pamilya nga anaa sa mga munisipyo sa matag lungsod sa Davao Occidental ug Davao del Sur.
Sa pagsuwat ning maong balita, wala pa nakapagula og inisyal nga ihap sa mga pamilya nga apektado ang buhatan sa matag social welfare sa munisipalidad.
Nunot sa walay-puas nga bunok sa ulan, natala ang landslide sa Baluyan, Malalag, Davao del Sur, ang kalsada nga nagkutay sa Davao del Sur padung sa General Santos City.
Tungod niini, dili maagian ang kalsada, daghan ang nakulgot nga transportasyon, apan pagka-ala una sa hapon kagahapon gipahibalo sa LTFRB-Davao Region nga maagian na sa mga motorista ang dalan sa Baluyan, human sa gipahigayon ang paspas nga road clearing operations.
Sa pahibalo sa LTFRB-Davao, giingon niini nga mga ala una sa hapon, Huwebes, Nobyembre 17, maagian na ang Digos City padung General Santos City nga national road.
"[At] 17 November 2022, 1 o'clock in the afternoon, the National Road linking Digos City to General Santos is now open and passable to all vehicles after landslide has been cleared by the Department of Public of Public Works and Highways,” tipik sa pahibalo sa LTFRB-Davao Region.
Sa pagsuwat ning maong balita Huwebes, wala pa mipagula og anunsyo ang National Disaster Risk Reduction and Management Council kon madeklara ba ang state of calamity sa daghang mga lugar sa Davao del Sur ug Davao Occidental nga gibahaan.
Pahimangno gihapon sa awtoridad nga mag-igmat sa landslide ug pagbaha kung magsagunson ang ulan sud sa duha ka oras.