Bisan sa pagpangayo og pasaylo, ang inahan sa 13-anyos nga tinun-an nga nabanggaan sa usa ka sports utility vehicle (SUV) sa dakbayan sa Lapu-Lapu mopasaka gyud og kaso batok sa drayber.
Si Dario Elibeto, 34, nitahan sa kapulisan niadtong Miyerkules, Nobiyembre 16, 2022, o duha ka adlaw human sa giingong hit-and-run nga insidente sa pedestrian lane sa Barangay Basak, Lapu-Lapu City niadtong Lunes, Nobiyembre 14.
Si Police Major Karen Bancoleta, hepe sa Lapu-Lapu City Police Station 4, nitug-an sa SunStar Cebu sa Huwebes, Nobiyembre 17, nga si Elibeto nangayo og pasaylo sa inahan nga giilang si Cherry Mae Fuentes Pelayo dihang nagkita sila ug nakahigayon nga magka-estorya sa police station sa gabii.
Apan si Bancoleta niingon nga si Pelayo mopasaka og kasong reckless imprudence resulting to physical injury ug kalapasan sa balaod sa transportasyon.
Base sa pamahayag ni Elibeto, matod sa hepe sa kapulisan, nga iyang gisusi ang bata sa wala pa mobiya sa dapit, nangutana kon maayo ba ang naulahi dihang naigo.
Si Elibeto nipasangil nga gitubag siya sa estudyante nga “okay ra siya, busa mibiya siya.”
Samtang, si Pelayo niangkon nga ang iyang anak nakasinati og panakit sa liog human sa insidente.
Matod ni Bancoleta nga nagpaabot pa sila sa medical result sa tinun-an nga maoy ilakip sa pagpasaka og kaso batok kang Elibeto.
Nahitabo ang insidente samtang milabang sa dalan ang estudyante agi sa pedestrian lane samtang paingon sa Basak Night High School.
Si Bancoleta nisulti kang Elibeto nga aduna siyay responsibilidad sa pagsiguro nga okay ra ang bata ingon man pagtaho sa insidente ngadto sa pinakaduol nga law enforcer o police station.
Si Elibeto usa ka family driver ug lumad nga taga San Miguel, Bohol apan kasamtangang nagpuyo sa Barangay Banilad, dakbayan sa Mandaue.
Ang hepe sa kapulisan nagkanayon nga si Elibeto nitahan human nakadawat og subpoena ang tag-iya sa sakyanan gikan sa Land Transportation Office sa Central Visayas (LTO)-7.