Ang dakbayan sa Lapu-Lapu mopahigayon og tinuig nga kompetisyon alang sa clean and green tali sa 30 ka mga barangay sa dakbayan tumong nga mapalambo ang kalimpyo ug kahapsay.
Giaprobahan sa Konseho sa dakbayan sa Lapu-Lapu atol sa ilang regular session sa Miyerkules, Nobiyembre 16, 2022, ang resolusyon nga giduso nila ni Konsehal Annabeth Cuizon ug Celestino Aying, nga naghangyo sa Lapu-Lapu City Environment and Natural Resources Office (LLCENRO) ug Solid Waste Management Board (SWMB) sa pag-umol ug paglusad sa tinuig nga clean and green nga kompetisyon sa mga barangay sa dakbayan.
Namatikdan sa mga konsehal nga ang pagdumala sa basura nagpabilin nga usa ka isyu nga kinahanglan hatagan og pagtagad bisan pa sa presensya sa lokal ug nasudnon nga balaod.
“Isip usa ka destinasyon sa mga turista ug aron mapadayon ang pagpadayon sa atong lungsod, kinahanglan nato sigurohon nga ang pagdumala sa basura usa ka mahinungdanon nga bahin sa atong estilo sa kinabuhi,” tipik sa resolusyon.
Sa ingon niana, gitataw nila ni Cuizon ug Aying nga ang pagpreserbar sa kalimpyo ug kahapsay sa siyudad nagkinahanglan og sosyal nga partisipasyon, ug nidugang nga kini kinahanglan nga usa ka hiniusang buluhaton.