3K ka PWDs sa Cebu City modawat sa ilang ayuda

Mokabat sa 3,000 ka persons with disabilities (PWDs) ang makadawat og tulo ka buwan nga kantidad sa financial assistance gikan sa Cebu City Government sugod ning adlawa, Nobiyembre 18, 2022.

Si Ester Concha, pangulo sa City Social Welfare and Development Office (CSWDO), niingon atol sa Public Information Office Panghisgot Forum sa Huwebes, Nobiyembre 17, nga ang mga kwalipikadong PWDs makadawat og P3,000 matag usa.

Langkuban niini ang P1,000 nga hinabang pinansyal alang sa mga buwan sa Agusto, Septiyembre ug Oktubre nga nalangan tungod sa kakuwang sa pundo, matud niya.

Dugang ni Concha, adunay 13,339 ka PWDs sa dakbayan ug aron maapod ang tanang beneficiaries, dungan nga mahitabo ang distribution sa tanang 80 ka barangay.

Ang PWD kinahanglan usab nga pisikal nga anaa sa pag-claim sa cash aid tungod kay ang disbursing officer dili modawat sa bisan unsa nga authorization letter aron tugotan ang ubang mga indibidwal sa pag-claim sa kwarta, dugang niya.

Alang sa bed-ridden PWDs, ang CSWDO mopahigayon og house-to-house distribution ngadto sa mga benepisyaryo.

Si Concha niingon nga ang benepisyaryo igo lang mopresentar sa ilang orihinal nga PWD identification (ID) card aron ma-claim ang ilang financial assistance.

Kon dili ma-claim sa PWD ang ilang cash aid karong Biyernes, aduna pa silay kausaban aron makuha kini sa City Treasurer’s Office sa City Hall hangtod sunod semana, dugang niya.

Si CSWDO PWD focal person Flora Bering niingon nga aron makaparehistro isip PWD, kinahanglang magpakita ang aplikante og medical certificate aron pamatud-an ang disability sa maong tawo subay sa Republic Act 9442 nga nag-amendar sa Magna Carta for Disabled Persons.

Kinahanglan usab nga magpakita ang mga aplikante og barangay certification nga magpamatuod nga sila mga residente sa dakbayan sa Sugbo.

Apan aron maka-avail sa financial assistance, kinahanglang rehistrado ang PWD ug rehistrado usab sila nga botante sa dakbayan sa dili pa molapas sa 2013.