ARON nga matubag ang giatubang nga hagit diha sa "miscommunication, misconception, ug discrimination" sa Muslim community, gihimo ang labing unang Ulama Peace Summit sa Davao City, Huwebes, Nobyembre 17, 2022.
Sa Paglas Compound, Mamay Road ning siyudad, moihap sa 40 ka mga Muslim religious leaders ang misalmot sa programa nga gipangunahan sa Task Force Davao.
Kini nagtumong sa pagtubag sa miscommunication, misconception, ug diskriminasyon sa mga Muslim nga komunidad sa siyudad ingon man sa pagpahayag sa ilang mga pangandoy alang sa kalinaw.
Sa istorya sa Davao City Information Office, gibutyag niini nga ang pagpalig-on sa relasyon tali sa Muslim nga mga lider sa relihiyon ug sa lokal nga gobyerno, padulong sa pagtukod sa kalinaw, diin ang summit nakasentro usab sa pagpakaylap sa kultura sa seguridad sa Davao City.
Ang maong summit gisalmutan usab sa unom ka mga Muslim deputy mayors sa Davao City, si Task Force Davao Commander Darren Comia, Grand Mufti Region XI Mufti Alem Mohammad Yusop Pasigan, Presidente sa Mercy Islamic Foundation Shiekh Abu Muhammad Al-Kholaqi, ug uban pang mga public and religious functionaries.
Ang summit naglakip sa usa ka workshop diin ang mga ulama naghisgot ug naghimo sa ilang kaugalingon nga mga plano sa aksiyon kung unsaon pag-champion sa kalinaw sa ilang kongregasyon ug komunidad, ug usa ka pagpirma sa usa ka Manifesto sa Suporta alang sa summit ug sa mga tumong niini.
"We found it necessary na puntahan ang mga kasamahan nating (to go to our friends) ulama since they are the religious leaders and because we believe that they are the influencers of their own community. Kailangan nating hingin ang suporta at kooperasyon nang sa ganon ang ating culture of security maging maayos ang pagapatupad sa lahat ng sectors dito sa Davao City," ingon ni Comia.
Si Comia, kinsa mipresentar sa Summit's workshop outputs ngadto kang Mayor Sebastian Duterte, niingon nga tungod kay malampuson ang Ulama Peace Summit, lagmit mahimo kini nga tinuig nga kalihokan nga makapauswag sa kahimtang sa kalinaw ug seguridad sa dakbayan.
"May susunod pa ito kasi nagpropose sila (There will be another on because they asked) to continue this kind of engagement with them. This is just the beginning," sulti sa opisyal.
Usa sa mga resulta sa workshop mao ang hangyo sa mga ulama sa paghimo og ordinansa sa siyudad nga manalipod kanila gikan sa kasuko ug diskriminasyon.
Ang usa pa mao ang paghimo sa usa ka mas taas nga institusyon aron ipadayon ang misyon sa kalinaw sa mga ulama taliwala sa umaabot nga mga henerasyon.
Si Duterte niingon nga suportado niya ang sugyot sa ulama alang sa usa ka Islamic higher institution sa siyudad.
Matud niya nga sa Davao City, ang relihiyon dili gamiton nga himan sa pagbuhat og dautan. Gipahinumdoman niya ang mga partisipante sa naglungtad nga balaod batok sa diskriminasyon, nga giingon niya, kinahanglan gamiton ni bisan kinsa nga makasinati sa bisan unsang porma sa diskriminasyon. (Uban sa taho sa CIO-Davao)