Di mominos 952 ka mga residente sa Sitio San Jose 1, Barangay Labogon, dakbayan sa Mandaue ang nipasaka og kasong graft batok kang Mayor Jonas Cortes human ang mayor giingong wala nagtagad sa ilang hangyo nga sirad-an ang usa ka concrete batching plant nga giingong ilegal nga nag-operate ug naghatag og kakuyaw sa panglawas sa katawhan.
Kasong paglapas sa Section 3 sa Republic Act 3019 o Anti-Graft and Corrupt Practices Act ang gipasaka batok kang Cortes sa Office of the Ombudsman Visayas niadtong Oktubre 17 ning tuiga.
Sa pakighinabi sa SunStar Cebu niadtong Martes, Nobiyembre 15, 2022, usa sa mga residente ug nangulo nga representante sa kaso nga si Ines Corbo Necesario niingon nga una nilang gipasaka ang petisyon batok sa kompaniya sa Labogon Barangay Council ug sa City Planning Development Office atol sa pasiunang pagtukod sa planta niadtong Marso 19, 2019.
Si Necesario niingon nga ang petisyon nga nakatigom og 509 ka mga pirma niingon nga wala sila gipahibalo sa husto bahin sa pagtukod sa planta.
Ang batching plant naghimo og concrete-cement mixing, nga gituohan sa mga lumolupyo nga makamugna og mga risgo sa panglawas, ilabi na niadtong nagpuyo duol sa palibot sa kompaniya.
Base sa mga ebidensiya nga ilang nahipos, si Necesario niingon nga ilang nasuta nga nag-operate ang maong planta nga walay business permit ug ang pag-isyu sa ilang sanitary permit gikan sa City Health Office ug environmental certificate gikan sa Mandaue City Environment and Natural Resources Office pending pa sukad sa 2021.
Gawas pa niini, si Necesario niingon nga daghang mga residente nga nagpuyo duol sa establisemento ang nagsugod na sa pag-antos sa sakit sa baga tungod sa kadaghan sa abog nga nipagawas sa batching plant ug walay tulog matag gabii tungod sa kasaba nga gikan sa planta nga naglihok 24/7.
Si Necesario niingon nga nangayo sila og tabang ni Cortes labot sa maong butang pinaagi sa pagpadala kaniya og suwat niadtong Pebrero 24, 2020, apan wala kini nitubag.
Dugang pa niya nga nangayo usab sila og tabang sa buhatan sa Department of the Interior and Local Government (DILG) Mandaue aron makuha ang atensyon ni Cortes sa maong butang niadtong Hulyo 11 ning tuiga, apan wala gihapon motubag ang mayor.
Kini maoy nakaaghat kanila sa pagpasaka og kaso batok kang Cortes ug pagpangayo sa iyang suspensiyon sa serbisyo.
Gipangayoan og komento, si City Administrator Jamaal James Calipayan ug niingon nga wala pa sila nakadawat og kopya sa reklamo gikan sa Ombudsman.