Gisaway sa Human Rights Watch (HRW) sa Biyernes, Nobiyembre 18, 2022, ang Philippine National Police (PNP) tungod sa “undercounting” sa mga nangamatay nga may kalabotan sa padayon nga drug war ubos sa administrasyon ni Presidente Ferdinand “Bongbong” Marcos Jr.
Sa usa ka pamahayag, ang HRW deputy director for Asia Division Phil Robertson miingon nga base sa monitoring sa University of the Philippines’ Third World Studies Center, 127 ka mga indibidwal ang napatay sukad si Marcos miasumer niadtong Hulyo, layo sa 46 ka mga drug-related nga kamatayon nga una nang gitaho ni PNP Chief Rodolfo Azurin Jr.
Si Robertson nipadayag sa kasagmuyo human si Azurin miingon nga ang ihap sa mga nangamatay nga may kalabutan sa kampanya batok sa ilegal nga drugas sa milabay nga mga bulan ubos sa bag-ong administrasyon “gamay ra kaayo.”
“Even if one accepts the PNP’s figures, calling this death toll ‘very minimal’ smacks of insensitivity and callousness. Since the anti-drug campaign began seven years ago under then President Rodrigo Duterte, thousands of families of people gunned down have been crying out for justice,” matod niya.
“The government’s killing of 46 people is not ‘minimal’ by any standard. It’s outrageous. Friends of the Philippines should not be fooled,” dugang niya.
Matod ni Robertson nga ang PNP naila sa “pagmaniobra” sa statistics sa gubat sa drugas ug sa pagtanom og mga ebidensiya batok sa giingong mga suspek sa gubat sa druga aron dunay kapangatarungan sa ilang mga pangangkon nga nanukol ang mga durugista busa naaghat ang mga pulis sa pagpatay kanila.
Matod niya nga samtang una nang gipahibalo ni Marcos nga ang iyang gobyerno magtutok sa rehabilitasyon sa mga drug personality, “walay ebidensya nga ang mga awtoridad nakahimo og bisan unsa aron makahimo sa maong kausaban.” / SunStar Philippines