Tulo ka ka mga drug suspect nga nakuhaan og dul-an P150 milyunes nga kantidad sa methamphetamine hydrochloride (shabu) nasikop sa drug operation niadtong Biyernes, Nobiyembre 18, 2022, sa dakbayan sa Muntinlupa.
Ang operasyon niresulta usab sa pagkadiskubre sa usa ka medium-scale nga shabu laboratory.
Ang Philippine Drug Enforcement Agency (PDEA) nagkanayon nga sila si Aurelien Cythere, 41, ug Mark Anthony Sarayot, 42, nasikop atol sa pagserbisyo sa search warrant sa 304 Mabolo Street sa Ayala Alabang Village.
Nakuha gikan sa duha ka mga suspek ang kapin o kulang 20 ka kilong shabu nga gibanabanang mobalor og P136 milyunes ug nagkalainlaing kagamitan sa laboratoryo alang sa paggama sa ilegal nga drugas.
Gironda usab sa mga anti-narcotics operatives pinaagi sa laing search warrant ang usa ka balay sa 523 Madrigal Avenue sulod sa samang barangay, ug nasikop ang Canadian national nga si Ariana Golesorkhi human napalgan didto ang duha ka kilo nga shabu nga mobalor og P13.6 milyones.
Si PDEA officer-in-charge Gregorio Pimentel niingon nga ang grupo nigamit og modified setup sa paghimo og shabu diin gisagol kini sa liquid form, dayon gihugasan gamit ang acetone.
“It’s practically an odorless process, which is probably why they were confident in doing it here in a residential area,” matud niya.
“These suspects are linked to Mexican, Australian and Canadian drug trafficking groups. We are currently investigating these links and several other drug personalities,” dugang niya.
Kasong paglapas sa Comprehensive Dangerous Drugs Act of 2002 ang ipasaka batok sa mga suspek. (SunStar Philippines)