Xi: China, PH ‘magpabiling mahigalaon’

(Office of the President photo)
(Office of the President photo)

Ang Presidente sa China nga si Xi Jinping niingon nga ang Pilipinas ug China “kinahanglang magpabilin sa mahigalaon nga konsultasyon” sa tinguha nga madumala sa hustong paagi ang mga panagbingkil ug panaglalis mahitungod sa South China Sea (West Philippine Sea).

Si Xi adunay bilateral meeting uban ni Presidente Ferdinand “Bongbong” Marcos Jr. niadtong Huwebes, Nobyembre 17, sa Bangkok, Thailand sa sidelines sa 29th Asia-Pacific Economic Cooperation (APEC) Economic Leaders’ Meeting (AELM).

Sa usa ka pahayag nga gipagawas sa embahada sa China, si Xi niingon nga ang China ug ang Pilipinas kinahanglan nga maghupot sa estratehikong kagawasan, ipasiugda ang kalinaw, pagkabukas ug pagka-inklusibo, ug magpabilin sa dagan sa kooperasyon sa rehiyon.

“They should work together to reject unilateralism and acts of bullying, defend fairness and justice, and safeguard peace and stability in the region,” matud niya.

Ang Presidente sa China niingon nga sila andam kanunay sa pagpadayon sa regular nga komunikasyon sa Pilipinas ug sa pagpadayon sa pag-akomodar sa mga kabalaka sa nasud.

Gisubli usab ni Xi ang panginahanglan sa Pilipinas ug China sa paghimo og mga highlight sa kooperasyon ug pagpalambo sa kalidad sa kooperasyon alang sa katawhan, pagpalawom sa synergy tali sa ilang tagsa-tagsa ka mga programa sa imprastraktura, pagpalig-on sa kooperasyon sa limpyo nga enerhiya, edukasyon ug panglawas sa publiko, ug paghimo og mas konkretong mga lakang aron dugangan ang mga tawo-sa-tawo ug kultural nga pagbinayloay ug pagpalig-on sa suporta sa publiko alang sa panaghigalaay sa China-Philippines.

Iyang gipadayag ang kaandam nga mag-import ug mas dekalidad nga mga produkto sa agrikultura ug sideline gikan sa Pilipinas. Siya niingon nga ang China kanunay naglantaw sa ilang relasyon sa Pilipinas gikan sa estratehikong gitas-on.

“China will work with the Philippines to carry forward their friendship and cooperation, commit to national development and rejuvenation, and write a new chapter in China-Philippines friendship,” matud ni Xi.

Sa iyang bahin, si Marcos nagkanayon nga ilang gituki ang pagpalig-on ug pagpalapad sa relasyon sa Pilipinas-China partikular na sa mga bahin sa agrikultura, enerhiya, imprastraktura ug people-to-people connections atol sa ilang panagtagbo.

Matud niya nga ila usab nga gihisgutan ang iyang umaabot nga State Visit sa China sa Enero.

“It’s the first time that I’ve met President Xi Jinping and I was very happy that we were able to have this opportunity here in the APEC Meeting in Bangkok to have a bilateral meeting,” matud ni Marcos. “The bilateral meetings are really just a kind of getting-to-know-you and that was the same with our meeting,” dugang niya. (SunStar Philippines)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph