Dakong garbo sa tibuok Sugbo nga nalista nga ika-19 sa “Best Places to Travel in 2023” sa US-based travel guide Travel Lemming.
Ang Sugbo nalakip sa lima lang ka mga dapit sa Asya sa naasoy nga listahan: Bhutan, ika-2; Uzbekistan, ika-9; Xiaoliuqiu, Taiwan, ika-29; ug Chiang Rai, Thailand, ika-34. Ang top 10 sa listahan mao ang Lafayette, Louisiana; Bhutan; Utila, Honduras; Île Sainte-Marie, Madagascar; Kosovo; Salento, Colombia; Vanuatu; Lake Ohrid, North Macedonia; Uzbekistan; ug Detroit, Michigan.
Ang Sugbo, sumala sa Travel Lemming, “Perfect for all types of tourists, Cebu allows you to indulge in both thrilling experiences and waterfront relaxation. If you seek the latter, set your sights on Moalboal, Camotes and Bantayan Islands, all known for their scenic white-sand beaches.”
Makaingon kita nga wow sa komentaryo sa Travel Lemning.
Ug maobserbahan na nato ang pagpangabot sa mga langyawng turista ug pagbalik sa direktang international flights sa Mactan Cebu International Airport (MCIA).
Si Gobernador Gwendolyn ‘’Gwen’ Garcia nipabalik kagahapon, Nobiyembre 18, ug hangtod sa Dominggo, Nobiyembre 20, sa Suroy-Suroy sa Sugbo (Southern Herritage Trail) aron pagpalambo sa turismo nga labing unang higayon human sa duha ka tuig nga napalta.
Good luck. Sa Enero sa sunod tuig, ang naila sa kalibotan nga piyesta ni Sr. Sto. Niño ug Sinulog Festival mobalik usab sa linawas nga kalihokan. Segurado nga dugukon kini sa bagang duot sa mga deboto ug mga lokal ug langyaw nga turista.
Dakong parte ang turismo pagpatuyok sa ekonomiya sa Sugbo ug nagtuboy isip labing adunahan nga lalawigan sa nasod. Busa, mangandam kita sa laing opurtunidad nga mobangon human sa duha ka tuig nga negatibong epekto sa pandemiya sa Covid-19 ug pagkuso-kuso sa bagyong Odette sa Disyembre 2021.
Salamat, Sr. Sto. Niño sa kanunay nga pag-uban kanamo.