Mga duwa karon: Nov 19, 2022
12:30 pm- USJ-R batok SHS-AdC (High School)
2:00 pm- UC batok CIT-U (High School)
3:30 pm- USC batok USJ-R (College)
5:00 pm- USPF batok CIT-U (College)
Gipakaging sa University of Southern Philippines Foundation (USPF) Panthers ang gikahadlukang University of the Visayas (UV) Green Lancers, 59-56, sa usa ka kombati nga nasagulan og gamayng kontrobersya sa Cebu Schools Athletic Foundation Inc. (CESAFI) college basketball niadtong Huwebes sa gabii, Nobiyembre 17, 2022, sa Cebu Coliseum.
Sa himatyo nga pipila ka mga segundos diin naposte na ang final score, tataw nga gidawat na sa Green Lancers ang ilang kapildihan ug nakita nga nagpaingon na si coach Gary Cortes sa tungatungang bahin sa korte aron mo-congratulate sa Panthers.
Niadtong mga gutloa, nasayran nga ning-undang na sab pagduwa ang Panthers unya aduna na’y mga tawo nga ningsulod sa korte.
Apan sa wala damha, usa ka magduduwa sa Green Lancers kalit nga niitsa sa three-point land ug nasulod ang bola sa ring.
Gi-counted sa usa ka referee ang maong itsa nga makapugos unta og overtime.
Hinuon, naghugpong ang mga referee ug nadesisyunan nga dili na angay i-counted ang maong itsa sa klarong rason nga niisa na sa ilang puting bandera ang Green Lancers niadtong higayuna.
Wala na nireklamo ang Green Lancers ug gidawat na nila ang desisyon sa mga referee.
“Wala na man sab gyud to kay ni-concede na man mi pero ang usa ka referee niisa man gud sa iyang kamot nga counted kuno. Off night gyud mi ato,” pasabot ni Cortes.
Sa kadaugan, ang Panthers ningsaka sa 6-3 nga rekord samtang ang Green Lancers nahagbong sa 7-1 nga baraha.
Dobleng himaya ang gibati sa USP-F gumikan kay ningdaog sab ang Baby Panthers batok sa University of San Jose Recoletos (USJ-R) Baby Jaguars, 91-89, sa high school division.
Magpadayon ang aksyon sa kompetisyon karong adlawa.
Sa laing bahin, temporaryong gipahunong ni Commissioner Felix Tiukinhoy Jr. ang livestreaming sa mga duwa sa liga gumikan sa negatibong mga komentaryo nga nakuha niini gikan sa netizens.
“I regret to inform you that temporarily we will stop showing the basketball games in live stream due to negative comments in posts as everybody wants to be part of officiating too,” unod sa opisyal nga suwat nga gipadala ni Tiukinhoy ngadto kang Cesafi president Bernard Villamor.