Gilauman ang makapaukyab nga aksyon sa panagtagbo sa mga lider nga mao ang Magnolia Chicken Timplados Hotshots ug Bay Area Dragons sa main game karong alas 6:45 sa gabii, Nobiyembre 19, 2022, sa Philippine Basketball Association (PBA) Commissioner’s Cup sa Philsports Arena.
Ang Timplados kasamtangang nagsolo sa ibabaw dala ang 8-1 nga rekord samtang sikit nga nagsunod sa ikaduha ang Dragons nga adunay 8-2 nga rekord.
Ang modaog ning sangkaa makabaton og dakong purohan nga masulod sa top two spots, nga nagtangag og twice-to-beat nga benepisyo sa nagkaduol nga quarter-finals.
Si Dragons coach Brian Goorjian kanunay nga nipadayag sa ilang kahinam nga makaabot sa ilang destinasyon ug ilang ganti ang twice-to-beat saquarterfinals.
Ang Dragons mosalig og maayo sa ilang eksplosibong import nga si Myles Powell.
Sa ilang bahin, ang Hotshots mosalig sab sa ilang import nga si Nick Rakocevic.
Sa premirong duwa, magsangka ang San Miguel Beermen ug Phoenix Super LPG Fuel Masters sugod sa alas 4:30 sa hapon.
Ang duha ka mga kampo parehong nagkinahanglan og kadaugan aron makakumpayot og puwesto sa quarter-finals.
Ang Fuel Masters kasamtangang naa sa ikaunom nga dapit dala ang 5-5 nga rekord samtang ang Beermen naa sa ika-10 bitbit ang 3-5 nga baraha.
Ning sangkaa, adunay posibilidad nga moduwa na pagbalik ang higanteng Sugboanon nga si JuneMar Fajardo, kinsa taodtaod sab nga wala nakapakita og aksyon tungod sa operasyon sa iyang tutonlan.