Nakahukom ang Cebu City Sugbo Bike Lanes Board nga pasul-ubon na og helmet ang tanang mga tawo nga magbiseklita ubos sa jurisdiction sa dakbayan.
Kinahanglan usab sa bikers ang pagsubay sa bike lanes aron di sila dakpon kay diay, nalatid kini sa bike ordinance sa Siyudad. Kadtong di mosubay sa bike lanes, dakpon.
Apan nasusi na ba kaha sa bike patrollers ug mga opisyal sa board ang tanang lanes dinhi sa dakbayan sa Sugbo? Sama nianang karsada sa Labangon padung sa Tisa nga daghang nagbabag nga sakyanan ug uban pa sa bike lanes.
Ila ba kahang panakpon ang mga siklista nga di mosubay sa lanes nga dunay nakababag?
Daghan ang gusto nga mosubay sa bike lane, apan tungod kay dunay mga babag, molikay na lang sa pagsubay.
Mga tuig na kapin ang nakalabay, dunay usa ka call center worker nga nadisgrasya sa may dan V. Rama tungod kay dunay naninda gamit ang biseklita nga iyang gikabangga samtang siya nagsubay sa bike lane.
Ang nakapait, ang mao nga tawo ug mga kauban niini mao pay nibasol kaniya sa aksidente. Usa lang kadto sa mga hitabo, apan daghan sa mga siklista ang di ganahan mosubay sa bike lanes tungod sa mga babag.
KUYAW
Niadtong nagbisiklita pa ko, usa sa mga naamguhan nakong kuyaw mao ang kalit nga paglubag sa manubela, samtang naa ka sa daplin sa karsada ug dunay nagdulong nga sakyanan.
Few times na ko hapit maigo og sakyanan apan maayo na lang kay molingi man ko. Kadaghan ra ba sa bikers karon nga moliko nga way lingi-lingi.
Ang di tig bike kada adlaw di maka relate niini. Apan ako nga sa pipila ka katuigan nag bike to work, maka relate kaayo.
Kon dunay bike lane apan naay nagbabag, di na ko mosubay. Mogawas na kong daan aron ang magsunod nga sakyanan molihay nang daan.
Usa pa, di tanang mga higayon mabantayan ang bike lanes gikan sa mga obstruction. Naay mga karsada nga naay bike lanes apan nababagan. Unsa may buhaton sa board niana labina kon business establishment ang nakalapas?
SCHEDULE
Sa ako nang giingon, mahimo rang i-schedule ang higpit nga pagpatuman sa ordinansa, sama sa pagpasubay sa bikers sa lanes.
Unya, kadtong mga sakyanan,sama sa mga motorsiklo, kinahanglang dakpon ang driver nga mosulod sa bike lanes, sama aning sa dan P. del Rosario.
Apan di sa tanang mga oras tingali himuon ang pagpanakop.
Kabahin sa helmet, mas maayo nga ipatuman ni. Alang ni sa kaayuhan sa mga nag bike bisan kon slow moving ang biseklita. Lahi ra kon dunay proteksyon sa ulo sa posibleng pagkatumba sa biseklita.
Wa imbentoha ang bicycle helmet alang sa pag-adorno o pagpa cute samtang nagsikad. Di ra ba matag-an ang disgrasya, labina karon nga daghang mga sakyanan sa kadalanan.
Mas maayong protektahan ang kaugalingon daan kay sa magbasol sa kaulahian.