Nibalik na sab ning problema sa mga tawo nga mangangkon nga mga pulis ug manulod og balay. Magsakay pa og van ang mao nga mga tawo.

Usa ka netizen ang ni post sa ilang kasinatian sa mga kamot sa mao nga mga tawo. Bisan gud aircondition unit giapil pa sa pagdala, gitangtang gikan sa bongbong.

Way bisan usa nga nailhan ang mga biktima basta kay nagsakay kini og puti nga van.

Kaniadto, naproblema usab ang Philippine Drug Enforcement Agency (PDEA) 7 kay dunay mangronda nga magpatuo nga ilang mga operatiba unya mangilkil. Kini nga problema wa pa nasulbad kay wa pay bisan usa nga nailhan o nasakpan sa akto nga naghimo niini.

Apan ngano sab kaha nga ang mga biktima wa makapanawag og mga awtoridad nga unta duna man silay igong panahon? Wa ba usab sila masayod nga duna nay samang modus ani?

Niini nga mga hitabo, hayan naa sa tumang kahadlok ang mga biktima. Klaro usab kaayo nga di random kon bisan kinsa lang ang mataymingan sa mao nga kabuang.

Ang nanghimo niini nakaila sa ilang target ug ila kining giplano hinungdan nga paspas sila maka-execute. Kana gung gibalikbalikan ang usa sa mga biktima.

Ang makapasagmuyo kay ni report na sila sa mga pulis, apan way gihimong lakang.

Nganong di man suwayan sa pagsubay ang dapit diin nahitabo ang krimen kon wa bay mga CCTV camera nga posibleng nakakuha sa sakyanan? Nagtinapol ba ang mga pulis?

Bisan tuod way naangol o namatay ning mao nga hitabo, apan makapahadlok kini sa publiko. Kinsa bay di mahadlok niining mga tawo nga wa say kahadlok nga mosulod og mga balay ug manguha og mga butang?

Maayo kay si Cebu City police chief Col. Ireneo Dalogdog nimando na sa pag-imbestigar sa mao nga hitabo. Kinahanglan na kining mahunong o masumpo pinaagi sa pag-ila ug pagpasaka og kaso ning mga tawhana.