Ang labing taas nga opisyal sa prisohan sa Pilipinas, kinsa giakusahan nga maoy niplano sa pagpatay sa usa ka radio journalist, nimando usab sa pagkawot sa dako nga lungag sa nag-unang prisohan sa nasud aron pangitaon ang giingong gilubong nga bahandi, matod sa kalihim sa hustisya.
Si Bureau of Corrections Director General Gerald Bantag nag-atubang og sunod-sunod nga dili kasagaran nga mga alegasyon sukad nga gisuspenso sa miaging buwan.
Naglakip kini sa pagpamuhi og mga kabayo ug mga bitin sa naghuot nga prison complex sa habagatang utlanan sa metropolitan Manila ug pagpabaya nga niresulta sa pagtipun-og sa lawas sa 176 ka mga piniriso sa usa ka punerarya.
Human sa pagsuspenso ni Bantag, nadiskubrehan sa mga awtoridad ang usa ka dakong gahong nga gikalot sa mga backhoe sa prison complex sa dakbayan sa Muntinlupa nga daw mabaw nga tunnel sa ilawom.
Si Bantag nitug-an sa mga tigbalita nga iyang gimando ang pagkalot isip kabahin sa plano sa paghimo og extra-deep nga swimming pool aron mabansay ang mga personnel sa prisohan sa scuba diving. Mahimong gamiton ang mga trabahante isip tigluwas sa panahon sa pagbaha ug bagyo, matod niya.
TREASURE HUNTING
Apan si Justice Secretary Jesus Crispin Remulla miingon nga gisultihan siya ni Bantag pipila ka bulan ang milabay nga ang pagpangubkob usa ka bahin sa pagpangita sa usa ka bahandi nga gilubong sa mga Hapon ubos ni Gen. Tomoyuki Yamashita sa panahon sa Ikaduhang Gubat sa Kalibutan.
“I told him to stop it. It’s ridiculous,” sulti ni Remulla sa mga reporter, nidugang nga pagpangubkob usik sa panahon ug oras sa kagamhanan. “He’s not there to seek treasure, you’re there to run the corrections department.” (AP)