11 anyos suspek sa pagdunggab sa iro

Human masuta sa imbestigasyon nga usa ka menor de edad ang responsabli sa pagdunggab sa agtang sa irong libud-suroy nga ginganlan og ‘Bonbon’, ang kapulisan sa siyudad sa Sugbo nakig-alayon dayon sa Department of Social Welfare and Services (DSWS) aron mapaubos sa intervention ang maong bata.

Matod ni Police Lieutenant Colonel Janette Rafter, deputy city director for operations sa Cebu City Police Office (CCPO), nga human sa mando sa Cebu City Council ngadto sa kapulisan sa paglusad sa imbestigasyon, ila dayon kini nga gihimo pinaagi sa supervision ni Police Colonel Ireneo Dalogdog.

Dinhi ila dayon nga gilusad ang in-depth investigation ug dali nila nga nailhan kinsa ang nidagmal kang Bonbon gamit ang kutsilyo nga nagtaop pa sa ulo niini.

Tungod kay nagpangidaron pag-onse, kinahanglan nga mosulod na ang social worker office sanglit dili man mahimong mosulod ang kapulisan base sa balaod.

“Sa atong procedure when it involves minor, bisag unsa nga mga panghitabo or krimen it is really the DSWS has really to come in,” matud ni Rafter.

Sa maong kaso tungod kay 11 anyos pa ang bata, dili mamahimong ikiha kini og criminal o bisan unsa nga kaso sanglit diretso na kini sa DSWS alang sa himuon nga intervention.

Gimandoan usab nila ang Mabolo police station sa pagsusi kon gituyo ba sa bata ang pagpasakit sa iro o aksidente lamang kini sanglit nagpadayon pa man usab ang ilang pakisusi.

“Sa pagkakaron we have already instructed the PCP Commander to determine gyud sa iyahang pag-intent ana kon giunsa gyud to niya or was it just a playful effect or act lang to niya or there was really intent isa pud na sa atong gipalaluman sa atong imbestigasyon, part ni sa atong investigation,” dugang ni Rafter.

Apan giklaro sa CCPO nga mohatag na sila og progress report ngadto sa Konseho sa dakbayan labot na sa maong insidente. (AYB)