IMBES nga kalipay, kaguol ang gibati sa usa ka 34-anyos nga laborer human gibiyaan sa babayeng gihigugma dungan sa pagkadaug niini sa last-2 didto sa lungsod sa Nabunturan, Davao de Oro.
Gisaysay sa usa ka Alvin, 30 anyos, dihang nahinabi sa Superbalita Davao nga ang iyang higala ug kauban sa trabaho nga ginganla’g Osmonio labihan ang kaguol ug pagmahay sanglit, ang swerte’g kalipay nga naangkon napuliha’g kaguol.
Gibutyag ni Alvin nga niadtong adlaw’ng Huwebes, Nobiyembre 17, 2022 ang mao niyang higala mitaya og last-2 og gitay-an ang numero 33 gumikan kay pagka-adlaw’ng Sabado, Nobiyembre 19, 2022 ang ika-33 nga adlaw’ng natawhan sa asawa niini.
Matud pa nga adlaw’ng Biyernes maoy miguwa ang numero 33 ug midaug si Osmonio og kapin P10,000.
Giingon nga nagkuyog ang duha sa pagkobra sa daug alas 5 sa hapon human sa ilang trabaho og nagdungan pagpanguli sa siyudad sa Tagum sanglit, parehong taga-Tagum ang duha og wa sila’y trabaho sa gi-konstrak nga gambalay sa lungsod sa Nabunturan, adlaw’ng Sabado ug Dominggo.
Sumala pa nga pag-abot sa terminal sa siyudad naagni ni Alvin ang mao niyang higala nga mag-inom sa usa ka videoke house una mamauli sa tagsa-tagsa nila ka mga pamilya agi’g pagselebrar sa kadaugan.
Ug ang panagtagay, milungtad hangtod alas 12 sa tungang gabii uban sa duha ka mga ka-table nga mga babaye nga diin sumala pa ni Alvin pareho sila sa iyang higala nga labihan ang kahubog.
Dugang gibutyag ni Alvin, nga adlaw’ng Sabado imbes magselebrar sa adlaw’ng natawhan, labihan ang away sa mag-asawa gumikan kay matud pa ang nabilin nga daug sa last-2, anaa nalang sa P5 mil imbes nga P10 mil nga maoy gikasuk-an pag-ayo sa asawa ni Osmonio.
Giingon nga milayas ang asawa ni Osmonio ug giapas sa lalaki ngadto sa balay sa ginikanan niini sa lungsod sa Talaingod sa pagtuo nga atua kini apan, suma pa ni Alvin pakyas ang mao niyang higala sanglit, wa miuli sa ginikanan ang babaye, nga niadtong higayona nagsaulog unta sa adlaw’ng natawhan.
Sa pagsuwat ning maong balita, wa pa masayri kung asa miadto ang asawa ni Osmonio.