Gihuman sa University of Southern Philippines Foundation (USPF) Panthers ang ilang tahas sa double-round elimination pinaagi sa pagpukan sa Cebu Institute of Technology-University (CIT-U) Wildcats, 63-52, niadtong Sabado sa gabii, Nobiyembre 19, sa Cebu Schools Athletic Foundation Inc. (CESAFI) basketball college division sa Cebu Coliseum.
Ang Panthers mosulod sa semi-final round nga bawon ang 7-3 nga rekord nga nagpahiluna kanila sa ikaduhang dapit.
Sa semis, magsangka ang No. 1 batok No. 4 ug No. 2 batok No. 3 diin maggunit og twice-to-beat nga bintaha ang top two teams.
Sa ilang bahin, ang Wildcats naputlan na og paglaom nga makaabante human sa ilang kapildihan.
Ang Wildcats, nga nahagbong sa 1-7 nga rekord, dili na maluwas bisan modaog pa sila sa katapusan nilang duha ka mga tahas.
Sa laing duwa, gipanglampornas sa University of San Jose Recoletos (USJ-R) Jaguars ang University of San Carlos (USC) Warriors, 82-58.
Ang Jaguars ningpatong sa ikatulong dapit bitbit ang 4-4 nga rekord samtang ang Warriors, nga nakahuman na sa ilang tahas sa eliminasyon, nahagbong sa 4-6 nga rekord.
Ning puntoha, maghuwat na lang ang Warriors sa resulta sa nahabiling mga duwa una nila masayran kon makasulod ba sila sa semi-final round o dili.