Pareho nga dunay punto ang Cebu Chamber of Commerce and Industry (CCCI) ug Konsehal James Cuenco nga niduso og ordinansahon bahin sa Resiliency and Efficiency Amidst Disaster and Emergency (Reade) sa sisyon sa konseho sa dakbayan sa Sugbo niadtong Miyerkules, Nobiyembre 16, 2022.
Kini remedyo nga ordinansahon ni Cuenco nga importante sa mga establisemento sa komersiyo nga dunay ilang tagsa-tagsa ka standby power supply nga makasuplay sa gikinahanglang boltahe sa pagpadayon sa serbisyo o operasyon panahon sa kalamidad ug emerhensiya.
Hapit na ang unang anibersaryo sa pagkusokuso sa Bagyong Odette (Rai) sa Sugbo niadtong Disyembre 16, 2021 ug gitumbok ni Cuenco nga ang dakbayan nakaangkon og gibanabanang danyos nga dili mominos P1 bilyunes human sa naasyoy nga bagyo tungod sa kinatibuk-ang pagkawala sa kuryente ug tubig.
“Only a few commercial, telecommunication and banking establishments operated two days after the storm’s onslaught due to inexistent power sources,” tipik sa ordinansahon ni Cuenco ug ang back-up nga suplay sa elektrisidad kinahanglang makahatag sa labing ubos walo ka oras nga padayon nga operasyon sa negosyo.
Giila nga mga establisemento sa ordinansahon mao ang drinking water refilling stations, supermarkets ug groceries, botika, telecommunication towers and installations, ug commercial banks.
Apan si Charles Kenneth Co, presidente sa CCCI, miila sa katuyoan sa ordinansa hon apan nakamatikod sa daghang mga probisyon nga dili maayo sa mga negosyo, labi na sa mga nalambigit sa micro, small ug medium enterprises (MSME).
Matod ni Co, ang standby power requirement nga gipahamtang sa ordinansa magdala og grabeng palas-anon sa mga tag-iya og negosyo ug tungod usab nga ang proposed ordinance mag-require sa Office of the Building Official (OBO) nga mosusi sa standby power requirement provision sa dili pa moisyu og compliance certificate.
Sa kamahal sa dakong generator, dili kaha kini makapaluya sa mga gagmayng magpapatigayon sa pagbubo og puhonan?
Ang MSME maoy daghan ug dako ang ilang papel sa pagtuyok sa ekonomiya.
Samtang, balido usab pagpakabana ni Cuenco. Maayong mag-abot sa tunga o win-win solution.