Usa ka tambok nga babaye nagguyod sa iyang iro samtang nisuroy sa plaza. Usa ka lalaki nga nakakita niingon, “Hala, katambok sa imong baboy.” Ang babaye mitubag, “Di man ni baboy, iro man ni.” Matod pas lalaki, “Di man ikaw akong gikaestorya, ang iro man.”

Mao tingali nga milusad si Cebu City Mayor Mike Rama sa usa ka contest susama sa “The Biggest Loser” show sa telebisyon aron magpagamay sa tiyan ang mga tambok nga kawani sa siyudad sa Sugbo sud sa mosunod nga pito ka buwan.

Gipahibawo ni niya niadtong Lunes, Nobiyembre 14, 2022, atol sa usa ka flag raising ceremony sa Cebu City Hall. Apil niini ang 7,363 ka mga kawani sa City Hall. Matod pas mayor, ang mga kawani nga himsog og panglawas mas makaserbisyo sa publiko.

Ang gubat batok sa katambok mao ang labing ulahing gubat nga gilusad ni Rama. Ang iyang target mao kadtong mga dagko og tiyan. Wa pa maklaro kon unsay premyo sa maong contest ug unsa ang mga paagi aron sa pagpagamay sa tiyan.

Para nako ang gubat batok sa katambok maoy labing lisod sa tanang gubat nga gilusad ni Heneral, er, Mayor Rama. Ang gubat sa basura nga iyang gilusad masulbad man pinaagi sa pagpamalit og mga garbage truck ug pagdugang sa garbage collectors.

Laing lisod nga mga gubat nga iyang gilusad mao ang gubat batok sa baha, kahuot sa trapiko ug pagdahili sa yuta. Kining baha sa siyudad diha na sa unang panahon. Ang nakalahi lang nga karon ang baha duna nay daghang basura.

Pero sakto ang mayor nga iyang gilingi kining suliran sa pagkatambok, nga matod pa sa Department of Science and Technology-Food and Nutrition Research Institute (DOST-FNRI), nahimo nang usa ka silent epidemic sa minilyon ka mga Pilipino. Nisamot kini sa duha ka tuig nga lockdown tungod sa Covid-19 pandemic.

Sumala sa 2021 Expanded National Nutrition Survey (ENNS), 14 porsyento sa mga bata edad 5 ngadto sa 10 anyos, 13 porsyento sa mga edad 10 ngadto sa 19 anyos ug 38.6 porsyento sa mga hingkod edad 20 ngadto sa 59 anyos mga obese kon tambok.

Si Health Undersecretary Maria Rosario Vergeire, officer-in-charge sa Department of Health (DOH), niingon nga ang pagkatambok resulta sa daghang gikaon ug way ehersisyo. Ingon pas taga Cabadiangan, “Di ka makaingon nga ang katambok nagdagan sa dugo sa inyong pamilya, kay ang hinungdan, way nidagan sa inyong pamilya.”