Hapit na ang unang anibersaryo sa pagkusokuso sa Bagyong Odette (Rai) sa Sugbo niadtong Disyembre 16, 2021, ang grupo sa mga negosyante nipadayag sa ilang pagsupak sa gisugyot nga ordinansa bahin sa disaster resiliency.
Ang Cebu Chamber of Commerce and Industry (CCCI) nipadala sa ilang position paper atol sa public hearing sa City Council sa gisugyot nga Resiliency and Efficiency Amidst Disaster and Emergency (Reade) ordinance ni Konsehal James Cuenco niadtong Miyerkules, Nobiyembre 16, 2022.
Sa iyang ordinansahon, si Cuenco nitumbok nga ang dakbayan nakaangkon og gibanabanang danyos nga mobalor og di mominos P1 bilyones human sa pagkusokuso sa Bagyong Odette tungod sa kinatibuk-ang pagkawala sa kuryente ug tubig.
“Only a few commercial, telecommunication and banking establishments operated two days after the storm’s onslaught due to inexistent power sources,” tipik sa ordinansahon ni Cuenco.
Isip remedyo, ang ordinansahon ni Cuenco magkinahanglan sa mga importanteng establisemento sa komersiyo nga magsangkap sa ilang tagsa-tagsa ka negosyo og standby power supply nga makasuplay sa gikinahanglang boltahe nga gikinahanglan alang sa paghatod sa ilang mga serbisyo.
Ang back-up nga suplay sa elektrisidad kinahanglan nga makahatag labing gamay nga walo ka oras nga padayon nga operasyon sa negosyo.
Ang giila nga mga establisemento mao ang drinking water refilling stations, supermarkets ug groceries, botika, telecommunication towers and installations, ug commercial banks.
Ang presidente sa CCCI nga si Charles Kenneth Co miila sa katuyoan sa ordinansahon apan nakamatikod sa daghang mga probisyon nga dili maayo sa mga negosyo, labi na sa mga nalambigit sa micro, small ug medium (MSM) nga negosyo.
Matod ni Co, ang standby power requirement nga gipahamtang sa ordinansahon, magdala og grabeng palas-anon sa mga tag-iya og negosyo tungod sa sobrang presyo sa mga produktong petrolyo.
Tungod kay ang proposed ordinance mag-require sa Office of the Building Official nga susihon ang mga establisemento ug susihon kon nakatuman ba sila sa standby power requirement provision sa dili pa mo-isyu og compliance certificate, si Co niingon nga makapaluya kini sa umaabot nga investors sa dakbayan.
“Gi-discourage ang mga negosyante nga mamuhunan sa Dakbayan sa Sugbo kay kining Reade Compliance Certificate kay laing documentary requisite aron makigkita sa dili pa makakuha sa Mayor’s Permit,” matod ni Co.
Sa ilang position paper, si Co niapelar sa kagamhanan sa dakbayan nga kinahanglang idirekta ang mga fuel station nga hatagan og prayoridad ang mga business establishment aron ilang mamentinar ang padayon nga operasyon panahon sa emerhensya.
Gihangyo usab ni Co ang mga establisemento sa negosyo kinahanglang hatagan og igong panahon sa pagtuman sa Reade Compliance Certificate kon maaprobahan ang proposed ordinance.
Ubos sa ordinansahon, hatagan og 30 ka adlaw ang mga negosyo sa pagtuman sa tanang probisyon sa ordinansa.
“As much as we recognize laudable actions by the city government officials, nevertheless, the most important is to help and assist Singapore-like Cebu City would be attained public welfare,” matod ni Co.