Malinawon ug malampuson ang kataposan sa upat ka mga hugna sa Bar exams sa duha ka test sites sa dakbayan sa Sugbo, Nobiyembre 20, 2022.
Samtang giila sa Civil Service Commission (CSC) ang Korte Suprema (SC) isip pioneer sa digitalized ug regionalized professional licensure tests sa pagpahigayon sa Bar Examinations karong tuiga.
Ang CSC adunay plano nga mobalhin gikan sa tradisyonal nga pen-and-paper Civil Service exams sa umaabot.
Sa pagpahalipay sa SC, ang CSC nagpahayag sa ilang suporta sa mga paningkamot sa Korte Suprema ngadto sa “digital nga pagbag-o sa pagpahigayon sa Bar Examinations,” ang SC miingon sa usa ka press release nga gi-post niini sa ilang website niadtong Dominggo, Nobiyembre 20, 2022, ang katapusang adlaw sa mga eksaminasyon.
Ang Bar exams gipahigayon sa 14 ka testing centers sa tibuok nasod niadtong Nobiyembre 9, 13, 16 ug 20.
Sa Cebu City, ang testing centers mao ang University of Cebu (UC) Banilad campus ug University of San Carlos main campus.
Kini ang ikaduhang regionalized Bar exams, siyam ka buwan human sa 2020-2021 Bar Examinations nga gipahigayon niadtong Pebrero 4 ug 6 ning tuiga.
Ang 2020-2021 Bar exams mao ang una nga rehiyonal ug digitalized nga pagsulay alang sa mga nagtinguha nga abogado. Katulo na kini na-postpone sa wala pa kini gipahigayon niadtong Pebrero sa 28 ka testing centers sa tibuok nasod (upat sa Sugbo) nga gipili sa Korte Suprema.
Si Chairperson Karlo Nograles maoy nangulo sa mga delegado sa CSC sa paglibot sa testing center sa Ateneo de Manila University niadtong Dominggo, Nob. 20 aron pag-obserbar sa pagpahigayon sa Bar exam.
Ang delegasyon sa CSC giubanan ni Associate Justice Alfredo Benjamin Caguioa, ang 2022 Bar Examinations chairperson.
Sa wala pa ang tour, si Nograles nipadala og suwat ngadto sa SC, nga naghangyo kang Caguioa nga tugotan ang CSC sa pag-obserbar sa operasyon sa Bar exam ug command center sa Ateneo.
Si CSC Chairperson Nograles niingon nga ang CSC nibalik na sa administrasyon sa Civil Service Examinations – Pen and Paper Test (CSC-PPT) gikan sa halos duha ka tuig nga pagkasuspenso tungod sa Covid-19 pandemic.
Sa unang bahin ning tuiga, ang CSC nipahigayon og walo ka eligibility examinations nga adunay 213,081 ka mga nikuha, nga miresulta sa 35,382 ka mga nakapasar.
Samtang, ang mga eksaminasyon niadtong Agusto 2022 nikabat og 26,307 ang nakapasar gikan sa 138,703 ka mga nikuha.
Ug niadtong Oktubre 2022, nikabat sa 74,766 ka mga examinees ang mikuha sa tulo ka Civil Service Examinations nga gidumala sa tibuok nasod.