Maayong piyesta sa Birhen sa Regla sa dakbayan sa Lapu-Lapu karon, Nobiyembre 21, 2022.
Samtang, dili mominos sa P1 milyunes ang nahatag nga ganting salapi alang sa mga mananaog sa nagkalainlaing kategoriya sa Garbo sa Lapu-Lapu 2022 competition nga gipahigayon sa Mactan Newtown sa Sabado, Nobiyembre 19, 2022.
Ang kategoriya naglakip sa ritual showdown, diin ang Barangay Maribago maoy kampiyon nga adunay ganting salapi nga P300,000, gisundan sa clustered Barangays Basak ug Subabasbas nga adunay P200,000 ug Barangays Pajo ug Poblacion nga adunay P150,000.
Sa float category, ang Barangays Basak ug Subabasbas contingent nakadawat og P100,000 isip kampiyon, samtang P75,000 ug P50,000 ang gihatag sa Barangay Pusok (first runner up) ug Barangay Punta Engaño (second runner up), matag usa.
Sa laing bahin, ang clustered Barangays Gun-ob ug Canjulao nakadawat og P50,000 isip kampiyon sa street dancing competition samtang ang Barangays Pajo ug Poblacion nakadawat og P40,000 nga ganting salapi. Ang Olango Island nga nakakuha sa ikatulong puwesto, nakadawat sab og P30,000.
Ang labing maayo sa Andas nakuha sa Barangays Mactan ug Pusok, diin nakadawat sila og P10,000.
Ang ubang pasidungog naglakip sa: Best in Costume (Brgys. Gun-on ug Canjulao), ug Best in Musicality (Brgy. Maribago), ang contingent nga nakadaog sab og Best in Graphics ug Video presentation.
Gawas niini, kinatibuk-ang P45,000 ang nahatag sa mga mananaog sa Festival Queen: P20,000 sa Gun-ob ug Canjulao cluster (Garbo sa Lapu-Lapu 2022 Festival Queen), P15,000 sa Brgy. Maribago (first runner up) ug P10,000 para sa Brgy. Subabasbas (second runner up).
Si Mark Anthony Baustista, public information officer sa dakbayan, niingon nga ang Fiesta Executive Committee 2022, pinangulohan ni Congresswoman Cynthia Chan, gikatahong nakatigom og mokabat sa P6 milyones alang sa mga aktibidad sa piyesta karong tuiga.
Ang Garbo sa Lapu-Lapu maoy usa sa mga kalihukan atol sa tinuig nga kasaulogan sa fiesta sa dakbayan isip pagpasidungog sa Nuestra Señora de Regla karong Nobiyembre 20 ug Nobyembre 21.
Mapasigarbuhon nga giablihan ni Lapu-Lapu City Mayor Junard “Ahong” Chan ang kalihokan human sa duha ka tuig sa paghunong tungod sa coronavirus disease (Covid-19) pandemic.
Ang Garbo sa Lapu-Lapu ritual showdown wala gihimo sud sa duha ka tuig tungod sa mga pagdili sa quarantine ug gikansela sa 2020 o sa kataas sa pandemiya.