WALA gikauwaw sa 42-anyos nga misis ang bag-ong karelasyon nga giingong tiguwang ug bati og nawong kumpara sa kanhi mister nga sumala pa artistahon ang pamarog ug panagway.
Kini ang gibutyag sa usa ka alyas Evelyn nga sumala pa kanhi klasmate sa maong misis nga gitago sa pangalang Honeylyn, usa ka 43-anyos.
Gisulti ni Evelyn nga ang mao niyang klasmate maoy gipakaslan sa lalaking iyang gihigugma kaniadto samtang sila nagtungha pa sa high school, tuig 1996.
Matud pa, nga sa ulawing reunion sa ilang batch niadtong unang semana sa Nobiyembre, sila maoy nahimong center of attraction.
Kini gumikan kay gidala sa babaye ang bag-ong karelasyon nga usa ka foreigner nga edaran nga gihulagway nga itom ug mubo kinsa anaa sa pangedaron nga 73-anyos.
Sumala pa nga daghan ang nangutana kung asa ang kanhi bana ni Honeylyn nga kaniadto nailhan isip campus crush, apan, giingon nga ang maong misis igo lamang mipahiyom ug mitubag, "Akong gibiyaan kay kusog kaayo mohagok ug baho pa gyod og ilok."
Matud pa nga dunay nangatawa ug mituo apan, gisulti ni Evelyn nga mas daghan ang nasayod sa kamataoran nga ang mao nilang klasmate nga si Honeylyn nahimong marter sulod sa hataas nga mga katuigan gumikan kay ang lalaking gipakaslan iresponsable ug way baroganan.
Dugang pa nga kanunay’ng mahubog ug sa higayon nga mahubog, pasakitan ang babaye nga maoy hinungdan nga nakigbulag kini, nanarbaho sa abroad ug didto nakaila ang lalaki nga karon maoy nahimong sandigan sa napakyas nga kaminyoon.
Sumala pa nga usa ka biyudo ug adunahan ang lalaki nga karelasyon karon ni Honeylyn nga matud pa andam mogasto og dakong kantidad matangtang lang ang rehistro sa kaminyoon sa babaye sa una niining bana.
Dugang gibutyag ni Evelyn nga tungod sa maong hitabo, nakaamgo siya nga dili basehan ang kagwapo ug kagwapa alang sa maluntarong relasyon kundi ang maayong batasan ug kinaiya sa matag-usa.
Nagpasalamat si Evelyn nga dili siya ang napakaslan sa giiingong campus crush kaniadto sa ilang tunghaan gumikan kay kung nahitabo pa, siya unta ang mag-antos sulod sa hataas nga mga katuigan.