Bisan asa ta dapit molingi sa atong gipuy-an o bisan asa ta molaag, anaa ang bundo sa nagkadaiyang mga plastic nga basura nga maoy atong gigamit sa inadlaw nga mga kalihokan gikan sa pagkaon ngadto sa ubang panginahanglanon.
May kahigayonan na nga mahimong kwarta ning klase sa basura kay ang organisasyon nga Friends of Hope nakigtagbo kang Cebu City Mayor Michael Rama aron maestablisar ang programang Aling Tindera nga maoy makasulbad sa problema sa basura sa dakbayan.
Kining mga Aling Tindera maoy moilis kinilong mga plastik nga dad-on sa mga lumolupyo sa Cebu City nga di na magamit.
Ang Friends of Hope nagtanyag kang Rama og 30 ka mga Aling Tindera alang sa tibuok dakbayan apan buot si Rama nga 300 ang tukoron niini. Ang kantidad sa matag kilo ning mga “soft plastic” anaa sa P2 ngadto sa P2.50. Kini naglakip sa mga putos sa biscuit, plastic bag ug mga garbage bag.
Kon magkugi lang ang usa ka tawo, gamay ra kaayo ang P100 nga imong kitaon niini matag adlaw.
Makatabang pa nga mominus ang atong problema sa polusyon nga makadaot sa kalikupan ug kanatong katawhan. Mamahimong recyclable materials na usab kini nga mahimong mabaligya ngadto sa laing kompaniya.
Kini nga ideya di na bag-o kay sa ubang kanasuran milampos na sila niini. Bisan ang hugaw sa tawo ug ubang mga mananap gipahimuslan naman nila.
Dihang nakabisita ko sa Sweden niadtong Mayo, nasuta nako nga ang mga bus nga sige nakong sakyan pulos biogas ang gigamit sa pagpadagan niini ug gamay na lang ang nagamit sa natural gas nga pwerte nang mahala.
Ang organic waste nga sama sa salin sa pagkaon, tanom ug mananap lakip ang hugaw sa tawo gihimo nang tinubdan sa biogas production nga mopaminos niini ang epekto sa pag-usab sa panahon lakip ang polusyon sa hangin ug dakong natabang sa transportasyon kay mao naman ang gihimo sa pagpadagan niini.
Kon mahimong kwarta ang mga plastic nga atong gilabay, wa sad tingali rason nga ang hugaw sa tawo mamahimo usab nga atong kapahimuslan diin minilyong katawhan ang masalbar ilabina ning nagkagusbat tang kalikupan. (josephelvirtubilan@gmail.com)