Human sa iyang paglingkod isip mayor sa dakbayan sa Sugbo, gipaspasan dayon ni Mayor Michael Rama ang iyang tinguha nga mahimong sama sa Singapore ang siyudad. Di lalim ni nga tahas.

Iyang gipahawanan ang daplin sa kasapaan pinaagi sa pagpatuman sa three-meter easement. Giestrikto ang pagpatuman sa ordinansa batok sa pagpataka og labay og basura, pagpataka og pangluwa ug pagpangihi.

Gipalimpyuhan usab niya kanunay ang kasapaan aron di na mosuyla ang tubig matag uwan. Pagbuhi usab kini sa kasapaan.

Apan mao lagi na, di lalim ang tahas sa mayor tungod kay ang una niyang maigo mao ang mga lumolupyo nga maapektuhan, labina sa pagpanghawan sa kasapaan.

Di lang ang illegal settlers ang maigo, apil na ang mga balay patigayon ug residential houses sa mga naandang namuyo sa daplin apan nisulod na sa ngilit sa sapa.

Apan kon tan-awon ang mga lakang nga gipatuman sa mayor, maayo kaayo ang tumong niini.

Ang pagbadlong sa magpataka sa paglabay sa basura, pataka og pangluwa ug pagpangihi gitumong aron malimpyo ang kadalanan sa siyudad nga sama og dakong landfill kanhi tungod sa nagkatag nga mga basura daplin sa kadalanan.

Alang usab sa maayong panglawas ang di pagpataka sa pagpangluwa kay basin, dunay mananakod nga sakit makatakod tungod lang sa pangluwa. Ngil-ad usab kon ang dapit nanimahong angso kay daghan ang nangihi.

Pinaagi sa pagpatuman sa three-meter easement, ang mga lumolupyo sa daplin sa sapa mahilayo sa peligro sa baha. Ning panahon sa grabeng epekto sa global warming, ang baha karon mas dako ug mas kusog.

Kaning tanan depende ra sa atoang pagtan-aw. Kon naglantaw kita sa kaayuhan sa umaabot nga henerasyon, ang lakang ni Rama alang sa maayong ugma sa dakbayan. Kinahanglan lang nato usbon ang atoang mindset o panghuna-huna.