Magmula inyang mikatagmu kata
Pignasan ku na
Ing mikanlapit kata pa sa’ng lakwas.
Ika...mu ing minye lingap
Kening pusung binang mengulila.
Dinugpa ka king kanakung arapan
At ginising mu ku
King makabang panga-idlip ku
Inya e ka miwale keni
King isip a pugad ning legwan mu.
O, pugung dalan, pakamalan...
Balikdan mu’ing benging ayni.
Anging munag panenayan,
Mal kung pugung dalan!
Kalingwan mu mang tupdan ing tipan mu,
E ku maginakit ditak mu man...ali!
Lakwan mu man ining sale pigsawan,
E ku isumbat keka...o. pugung dalan.
Mal kung pugung dalan
Pakit mu’ing kekang timan,
Nung pagmasungit mu
Lakwas kung panalumduman.
Sintang pugung dalan,
Mayap ing pamalsinta mu
At nung isalikut mu
Labwad ku dalumdum ne ngan.
Manibat inyang mikawani kata
Penayan ku na
Ing mislapung kata pa sa gasgas.
Nanu ing bage
magpapaldan king isip kung melingo?
Gilutan mu ing kanakung yayampang
At pebustan mu ku
King malalam a pangasukul ku,
Inya e ka milako keni
King pusung alipan ning timyas mu.
O, pusung dalan...kaluguran.
Kelingwan mu’ing bye kung ayni
Pamandugpa pagdulapan...
Mal kung pusung dalan.
“PUGUNG DALAN”
Kegaywang Tigtigang Kapampangan,
Sunis nang Miguel Serrano, Bulan ning Agostu, Banwang 2006