Ang Central Visayas maoy adunay labing daghang nasikop nga high-value drug suspects sa miaging 100 ka adlaw sa administrasyon ni Presidente Ferdinand “Bongbong” Marcos Jr., matod sa Philippine National Police (PNP) sa Martes, Nobiyembre 22, 2022.

Si PNP Chief Rodolfo Azurin Jr. nagkanayon nga 250 ka high-value drug target ang nasikop sa rehiyon gikan sa Hulyo 1 hangtod Oktubre 8.

Sunod sa Central Visayas mao ang Central Luzon nga adunay 203 nga nadakpan nga high-value drug suspects, Calabarzon nga adunay 156, Davao nga adunay 132, ug National Capital Region nga adunay 123.

Matod ni Azurin nga adunay kinatibuk-ang 13,391 ka mga drug suspect, lakip ang 1,531 ka mga high-value target ang nasikop atol sa pagpahigayon sa 12,321 ka anti-illegal drugs operations sa maong panahon.

Silang tanan gipasakaan og kasong kalapasan sa Comprehensive Dangerous Drugs Act of 2002.

“These significant accomplishments remarkably describe the aggressiveness of the intelligence-driven supply reduction strategy with strong emphasis on non-violent methods of effecting arrest while ensuring protection of operating teams engaged in violent confrontation with armed suspects brought by proper equipment and training,” matod ni Azurin.

Pinaagi sa holistic approach isip bag-ong nawong sa anti-illegal drug campaign sa gobyerno, si Azurin nipasalig nga ang PNP magpabilin nga nag-una sa nasudnong estratehiya batok sa problema sa drugas sa nasud.

Matod ni Azurin gikan sa Hulyo 2016 hangtod Nobiyembre 2022, 26,200 ka mga barangay ang nadeklarar nga cleared gikan sa kinatibuk-ang 35,356 ka barangay nga kanhi gi-tag isip drug affected sa illegal nga drugas, ubos sa Barangay Drug Clearing Program sa gobiyerno.

Sukad nilingkod si Marcos, 403 ka barangay ang gideklarar nga cleared sa illegal nga drugas.

Ang Cagayan Valley adunay pinakataas nga natala nga drug cleared barangay nga adunay 94.41 porsyento, gisundan sa Cordillera Region sa 94.36 porsyento, Mimaropa sa 93.95 porsyento, Eastern Visayas sa 93.09 porsyento, ug Soccsksargen sa 88.25 porsyento. (SunStar Philippines)