Giingong hitman, notadong kawatan ug manglabnihay nga mao usay suspek sab sa pagpusil patay sa usa ka drug personality sa Barangay Hipodromo niadtong Dominggo sa alas 11:40 sa gabii, Nobiyembre 20, 2022, nadakpan sa buy-bust sa Parian Police Station sa alas 10:10 sa Lunes sa gabii, Nobiyembre 21 sa Sityo BSJCO, Barangay T. Padilla, dakbayan sa Sugbo.
Ang suspek giila nga si Jaymil Obeña Sarimugan, alyas Melmel, 18, nagpuyo sulod sa Chinese Cemetery sa Barangay Carreta, dakbayan sa Sugbo.
Si Sarimugan suspek sa mga pagpamusil sa Barangay Mabolo ug gihulagway usab nga isnatser.
Nakuha gikan kang Sarimugan ang 16 ka pakete sa gituohang shabu nga motimbang og 20 gramos nga dunay standard drug price (SDP) nga P136,000, lakip ang usa ka kalibre .38 nga revolver.
Matod ni Police Major Efren Diaz, hepe sa Parian Police Station, nga dugay na nila nga gipangita si Sarimugan tungod kay nalambigit sa sunodsunod nga mga pagpanulis sa area sa Parian.
Mangigo usab kini sa area of jurisdiction sa Mabolo Police Station, Abellana Police Station ug sa Subangdaku, siyudad sa Mandaue.
Gani, dunay video nga mikatap sa social media diin nakita ang paglabni ni Sarimugan sa cellular phone sa usa ka pasahero sa jeep, dayong sibat.
Nabutang usab siya sa listahan sa mga nalambigit sa illegal nga drugas, diin gihulagway niya kini nga idlas.
“We’re just lucky na gabii ba ang among informant gi-transact nila si Melmel, mao to nag conduct mig buy-bust operation together with Station 4,” matod ni Diaz.
Gibutyag ni Diaz nga atol sa pagdakop sa suspek high pa kini sa illegal nga drugas.
Giingong niangkon ang suspek nga siya ang nipusil patay kang Argie Jervacio Isidto, 32, sa Sityo San Roque Rail Site II, Barangay Hipodromo.
Giingong nasuko si Sarimugan nga wala siya bayri sa utang sa biktima sa illegal nga drugas.
Human sa pagpusil, nisibat siya paingon sa Parian diin didto nagtago apan nagpadayon sa pagbaligya sa illegal nga drugas.
Dunay lima ka mga kaso sa pagpamusil nga nahitabo sa Mabolo diin upat ani namatay nga siya ang gitumbok nga responsabli.
“Naa mi nakuha nga cases niya way back 2020 sa Station 4 sa robbery and theft. Nya siya sad ang primary suspect sa lima ka shooting incident didto sa Station 4,” dugang ni Diaz. (AYB)