Wala pa’y December apan daw sa nagpasko na ang mga Kapusong Cebuano sa miaging semana tungod sa back-to-back events sa GMA Regional TV ug Synergy.

Ang Asia’s Limitless Star Julie Anne San Jose ug Total Heartthrob Rayver Cruz (JulieVer) ang nibukas sa kalingawan niadtong Sabado sa gabii isip special guest stars sa Marco Polo Plaza Cebu’s Christmas Tree of Hope Lighting Ceremony. Mao ni ang ilang ika-13 katuig nga partnership nga gihimo isip kabahin sa fund raising sa GMA Kapuso Foundation.

Sa mediacon nagpakilig ang JulieVer kay bisan walay label ang ilang relasyon apan wala nila gi-deny nga mahal nila ang usa’g usa.

“Julie Anne is the one for me,” matod pa ni Rayver. Dugang usab ni Julie Anne, “hindi mahirap magustohan si Rayver dahil napakabuti niyang tao.”

Ang JulieVer nag-promote karon sa ilang “JulieVerse Concert” nga hapit na ma-sold out sa Newport Performing Arts Theatre sa Manila karong Sabado, November 26.

Samtang niadtong Dominggo silang Asia’s Multimedia Star Alden Richards ug box office icon Bea Alonzo ang nakauban sa mga Kapusong Cebuano atol sa Kapuso mall shows sa Gaisano Grand Mall Mactan ug Ayala Center Cebu.

Sa mediacon gikumpirmar ni Alden ug Bea sa Superbalita nga ang ilang Philippine adaptation sa Koreanovelang Start-Up.Ph matapos na sa December 23. “Kasi yun talaga ang contract, 13 weeks lang yung story, we cannot extend it cuz mawawala yung ganda ng story,” pasabot ni Bea.

Sol Eugenio ang bangis sa The Path to Avalon

Ila-ilaha ang usa sa mga cast sa gikahinamang stage musical nga The Path to Avalon-King Arthur nga buhing ipasundayag karong November 26 ug 27, Sabado ug Dominggo (1 p.m., 4 p.m., ug 7 p.m.) sa Centerstage-SM Seaside City Cebu.

Si Sol Eugenio ang mabangis ug way kaluoy nga kabalyero (Knight of the Round Table) nga si Sir Agravain of Camelot nga andam makigpatay gamit ang bisan unsang matang sa hinagiban.

“Sir Agravain is the most powerful, rebellious and fashionable young Knight in Uther’s reign (father of King Arthur). Jealousy, rage, drama and all possible emotions are involved. It was taxing to play him because I have to maintain and control his raging emotions the entire play,” matod sa Cebuano actor sa Superbalita.

Apan dili na bag-o ni Eugenio ang mga bug-at nga karakter isip beterano na sa mga international scene sama sa TV series nga “Almost Paradise (Season 1)” diin nidala siya nga tuong kamot sa karakter ni Isay Alvarez, ug sa upcoming Hollywood-based project nga “1521” isip usa sa mga datu sa Mactan diin lakip sa iyang nakauban sa taping sa Palawan silang Bea Alonzo, Maricel Laxa ug ang Hollywood legend nga si Danny Trejo, sa direksyon ni Michael Copon.

Gawas sa pag-arte, si Eugenio usa usab ka professional dancer. Siya ang nirepresentar sa Sugbo sa 2001 World Cup Argentine Tango Championships sa HongKong “with my tango partner now Cebu Provincial Tourism Officer- Marti Ybañez. We finished as finalist.”

Ang The Path to Avalon gi-produced sa Alba Productions ug dunay gitas-on nga duha ka oras ug 20 minutos apil na sa intermission.

“They can see me in all shows so any schedule will give you the opportunity to see me give life to Sir Agravain. I love the experience and I hope the audience can feel his loneliness and hidden love in spite of his enigmatic persona.”