Mga Christmas décor nga gipangmuntar sa center island ug ilawom sa overpass alang sa “Christmas City” nga programa sa Kagamhanan sa Siyudad sa Sugbo ang pabantayan na sa kapulisan human gipangkawat ang uban niini sa Osmeña Boulevard.

Nasubo ang organizers sa Christmas City dihang nakadiskobrehan nga naguba ug nawagtang na ang Christmas lights nga gitaod sa center island atbang sa Cebu Normal University (CNU) nga pasigaon na unta sa sunod semana.

Gitinguha sa Cebu City Government nga makita ang mga dayandayan sa Pasko ug ornaments sa nag-unang karsada sa siyudad nga mao ang Osmeña Blvd.

Tungod niini, matud ni Police Lieutenant Colonel Wilbert Parilla, deputy city director for administrations, gipatawag sa City Hall ang mga chief of police sa onse ka police stations sa mga opisyal sa barangay aron magpatabang nga mabantayan kini.

Giangkon ni Parilla nga kuwang ang police kon gamiton pa aron mobantay sa maong mga dekorasyon sa Pasko apan mamahimong magamit nila ang mga barangay tanod ug ang mga sakop sa Task Force Kasaligan. (AYB)