Ang dakbayan sa Lapu-Lapu mopalit og K9 dogs aron moabag sa pagsumpo sa illegal nga drugas.
Si Mayor Junard ‘Ahong’ Chan niingon nga ang Kagamhanan sa Dakbayan mopalit og K9 dogs subay sa rekomendasyon ni Police Colonel Elmer Lim, city director sa Lapu-Lapu City Police Office (LCPO).
“Sayod man gyud ta kon unsa ka-seryoso ang atoang Siyudad batok sa illegal nga druga,” matud ni Chan.
Matud ni Lim, ang pagbaton og mga iro nga sniffing makatabang kanila sa pagsumpo sa dugang illegal nga drugas sa dakbayan, ilabina sa mga entry ug exit points.
“Mas maayo gyud daghan ta og iro nga mo-detect og illegal drugs kay makakuha gyud ta. Duha ra, ma intercept nato or mahadlok sila, dili na sila mobalik sa atong area kay mahadlok sila,” matud sa city director, kinsa nagplano nga mohangyo sa mayor nga mopalit ang LCPO og tulo ngadto sa upat ka K9 dogs alang sa illegal nga drugas.
Si Lim niingon nga ang siyudad adunay usa ka K9 nga iro ubos sa Special Weapons and Tactics (SWAT) apan gituyo alang sa mga bomba.
Matod niya nga ang matag sniffing dog dili kaayo gastuso kay di mominos P200,000 ra, apil na ang training niini sulod sa mga tulo ngadto sa walo ka buwan depende sa potensyal niini.
“Karon pa lang mas maayo na nga maka procure na ta para magamit nato in the future,” dugang ni Lim.
Si Daanbantayan Mayor Sun Shimura, kinsa maoy presidente sa League of Municipalities of the Philippines (LMP) Cebu Chapter, sa sayo pa, nihangyo sa mga mayor sa pagpalit og K9 dogs o ubang kaliwat sa mga iro nga adunay potensyal nga makapangita og drugas aron makatabang sa pagpatuman sa balaod sa pagpangita sa maong mga illegal nga butang. (MKG)