Usa ka amahan nga wanted sa paglugos sa 13 anyos nga anak nasikop sa kapulisan sa UBCA 3, Barangay Quiot, dakbayan sa Sugbo, alas 10:00 sa buntag sa Martes, Nobiyembre 22, 2022.

Si Arman (tinuod ngan gipugngan sa pagpanalipod sa dungog sa bata), 49, minyo, electrician, nagpuyo sa nahisgutang lugar, nalista sa kapulisan nga third most wanted person sa Probinsya sa Sugbo.

Si Police Major Janelito Marquez, hepe sa Labangon Police Station nga nahinabi sa Superbalita Cebu, nagkanayon nga si Arman ilang nasikop sa joint operations nga gipangulohan sa Criminal Investigation and Detection Group (CIDG) 7 sa Cebu City pinasikad sa warrant of arrest sa kasong statutory rape nga giisyu ni Regional Trial Court (RTC) Branch 7 Judge Romeo Reyes, Jr. sa dakbayan sa Talisay, gipitsahan og Nobiyembre 21, 2022.

Si Marquez nibutyag nga ang asawa ni Arman maoy nisang-at sa kaso human giingong gilugos niini niadtong Marso 2022 ang 13 anyos nilang anak.

Ang suspek gikataho nga nilayas sa dakbayan sa Talisay ug nitago sa Barangay Quiot, dakbayan sa Sugbo.

Ang suspek nipadayag sa kapulisan nga iyang atubangon ang maong kaso. (GPL)