Usa ka nurse, unipormado, namugos pagsakay sa puno nga jeep kay hadlok ma-late sa trabaho. Usa ka anchorman sa radyo nga naluoy sa nurse, miingon, “Miss, sabakon ta lang ka.” Taudtaod miingon ang nurse, “Sir, taga radyo ka no?” Anchorman: “Nganong nakahibawo ka, Miss?” Nurse: “Nalingkoran man gud nako ang imong microphone.”

Dunay maayong balita sa mga sakop sa media. Gipasar niadtong Lunes sa kataposang pagbasa sa House of Representatives sa boto nga 252, way abstention, ang House Bill No. 454, nga maghatag og dugang mga benepisyo sa mga sakop media.

Kon mapasar nga balaod, ang House Bill No. 454, ang “Media Workers’ Welfare Act,” aplikado sa tanang mga sakop sa pribadong media. Ang ilang minimum nga suweldo di momenos sa gilatid sa Regional Tripartite Wage and Productivity Board. Duna pay overtime ug night shift pay subay sa Labor Code ug ubang mga balaod.

Kinahanglan nga ubos sila sa Social Security System (SSS), Home Development Mutual Fund (Pag-IBIG Fund) ug Philippine Health Insurance Corp. (PhilHealth). Magbahin sa pagbayad sa binuwan nga premium ang kompaniya ug kawani.

Ang mga sakop sa media nga mag-cover sa delikadong lugar o naigo sa sakit makadawat og hazard pay nga P500 matag adlaw ug hatagan sa ilang kompaniya og safety gear sama sa bulletproof vests ug protective equipment. Makadawat usab sila og P200,000 nga death benefit, disability benefit nga P200,000 ug medical insurance nga P100,000.

Ang usa ka trabahante sa media ilhon nga usa ka regular employee unom ka buwan gikan sa pagsugod sa pagtrabaho. Di siya mahimong taktakon sa trabaho kon di ipasubay sa due process ug sa gitugotan nga hinungdan.

Samtang ang media entity maoy responsable sa content o sa gisuwat ug gitaho sa sakop sa media, lakip sa mga block timers, sa tanang platforms. Gawas lang kon mapamatud-an sa media entity nga ilang gibuhat ang due diligence ug ang sayop ug kalapasan sa balaod iya da sa media worker o block timer.

Same-sex marriage gisalindot

Sa laing bahin, gisalindot sa Pilipinas ang same-sex marriage, usa sa mga rekomendasyon sa mga sakop nga estado sa United Nations Human Rights Council on the Legalization of Abortion and Divorce.

Si Justice Secretary Jesus Crispin Remulla niingon nga mao kini ang baruganan sa Pilipinas tungod kay supak kini sa atong kultura ug di pa andam ang nasod alang niini. Matod pa ni Remulla, gisalindot usab sa Pilipinas ang mga balaudnon sama sa Sexual Orientation, Gender Identity, and Expression Equality (SOGIE) bill.

Apan wa pay baruganan ang Pilipinas mahitungod sa diborsiyo tungod kay alang ni Remulla kinahanglan pa kining debatehan sa mga magbabalaod.

Si Justice Undersecretary Raul Vasquez niingon nga ang Pilipinas midawat sa 200 sa 279 ka mga rekomendasyon sa United Nations Human Rights Council on the Legalization of Abortion and Divorce. Apan wa una dawata ang 79 kay kinahanglan pa kini sa partisipasyon sa laing sanga sa gobyerno, buot ipasabot, sa Kongreso. (edbarrita@gmail.com)