NATALA nga walo ka mga tawo ang namatay atol sa hold-up ug engkwentro alas 3:15 sa hapon, Miyerkules, Nobiyembre 23, 2022, didto sa probinsiya sa Cotabato.
Gibutyag ni M'lang chief of police Lieutenant Colonel Realan Mamon nga walo ka mga suspetsado ang naghold-up sa Regz and Kirks Bakeshop sa Barangay Bagontapay, M'lang, Cotabato.
Dunay mga kustomer nga misulay sa pagsukol, apan sila gipamusil sa mga tulisan.
Dihang nakuha na sa mga hold-upper ang kuwarta, cellphone ug koleksiyon sa bakeshop, dali silang miikyas.
Miresponde dayon ang kapolisan ug dihang naapsan niini ang mga suspetsado, giingong nanukol sila nga maoy hinungdan sa 30-minutos nga pinusilay.
Unom sa mga suspetsado ang patay ug usa sa mga kustomer sa sa bakeshop ang nakabsan sa iyang kinabuhi samtang usa ang naangol.
Patay usab si Staff Sergeant Rudy Amihan ug naangol si Corporal Noli Labesores sa M'lang police sa ilang pursuit operation batok sa mga kawatan.
Sa pagkakaron, padayong gipangita sa mga awtoridad ang mga kauban sa unom nga napatay sa engkwentro.