DILI masukod ang kalipay sa katawhan nga nakabenepisyo sa nagkadaiyang serbisyo nga gihatod didto sa Barangay Sta. Fe, New Corella, Davao del Norte alas 8 sa buntag, Nobiyembre 23, 2022.
Gibutyag ni Barangay Kapitan Verulo N. Guzon sa Barangay Sta. Fe nga nalipay siya og dako nga ang ilang barangay maoy napili nga makatagamtam sa nagkadaiyang mga libreng serbisyo sama sa Handog Titulo, Medical Mission, Tambag Legal, libreng rehistro sa PhilHealth, libreng gupit ug libreng lugaw nga gituyo paghatod sa pagpanguna ni Vice Governor De Carlo “Oyo“ Uy ubos sa programa nga Project Oyo kauban ang Team Aldu.
Sa maong aktibidad, ang 62-anyos nga si Noli Bolindres nalipay og dako tungod kay matud pa makapatupi na siya og libre sanglit, suma pa niini, walay barbershop sa ilang barangay ug sa higayon nga sila magpatupi, mogasto og dako sa plite paingon sa sentrong bahin sa lungsod.
Daghan sab nga katawhan ang nakapahimulos sa medical mission nga diin usa si Dr. John Batacan sa Municipal Health Office sa Lungsod sa Asuncion ang miasikaso sa daghang mga pasyente uban sa mga kaubanang doktor.
Si Dr. Batacan matud pa nga gituyo siya pagpadala ni Mayor Atty. Eufracio Dayaday, Jr., ang mayor sa lungsod sa Asuncion agi’g suporta sa maong aktibidad.
Dugang gibutyag ni Kapitan Guzon nga ulahing nabisita sa mga opisyal sa probinsiya ang ilang barangay hataas na nga mga katuigan ang milabay ug nalipay siya nga sa bag-ong administrasyon bisan sa kalayo sa ilang barangay ug sa kalisod sa dalan nga agian labi na sa panahon sa ting-ulan gibisita pa gihapon kini sa kasamtangang bise gobernador ning probinsiya.
Gitawag nga "Araw ng Pasasalamat sa Barangay Sta. Fe, New Corella" ang maong aktibidad nga diin sumala pa ni Uy iyang gipasalamatan ang katawhan sa barangay ug ang gihimong pagbisita pagtuman sa saad sa milabay’ng kampanya nga siya mobalik sa maong barangay.
Gipahigayon usab sa maong adlaw ang oathtaking sa mga Barangay Kapitan ug Barangay Coordinators sa Tingog Partylist pinaagi ni Vice Governor Uy.
Kauban sa bise gobernador sa paghatod sa nahisgutang mga serbisyo sila Board Member Shirly Belen Aala ug kanhi PCL President Bong Aala.