Mga duwa karon:Nov 25, 2022

3:00 pm- Blackwater batok Rain or Shine

5:45 pm- Ginebra batok NLEX


Padayon sa ilang tinguha nga makailog og puwesto sa top two ang Brgy. Ginebra Gin Kings sa ilang pagpakigbatok sa NLEX Road Warriors sa main game karong hapon, Nobiyembre 25, 2022, sa Philippine Basketball Association (PBA) Commissioner’s Cup sa Philsports Arena.

Ang Gin Kings, nga gikan sa lima ka sunodsunod nga kadaugan ug adunay 7-2 nga rekord, kasamtangang naa sa ikatulong dapit sunod sa Magnolia Chicken Timplados Hotshots (8-2) ug league-leader Bay Area Dragons (10-2).

Kon buot hunahunaon, usa na lang sa top two spots ang ilugan gumikan kay nagseguro na mang daan sa Dragons ang usa.

Ang lig-ong kompetensya sa Gin Kings sa inilugay sa nahabiling usa ka luna sa top two mao ang Hotshots.

Mahinungdanon ang pagsulod sa top two gumikan kay nagtangag kini og twice-to-beat nga benepisyo alang sa nagkaduol nga quarter-finals.

Sa ilang bahin, garbo ug dungog na lang ang giapas sa Road Warriors gumikan kay kuli na man ang ilang purohan nga makaabante.

Naa sa ika-11 nga puwesto ang Road Warriors dala ang 3-7 nga rekord.

Sa premirong duwa, magsangka ang Rain or Shine Elasto Painters ug Blackwater Bossing.

Ang Painters naa sa ikasiyam nga dapit bitbit ang 4-6 nga rekord samtang naa sa ika-12 ang Bossing dala ang 3-8 nga baraha.