Ang Sugbo naila nga usa sa mga maanindot nga dapit nga giduaw sa minilyon ka mga turista matag tuig tungod sa maanindot nga mga dapit.
Ning bag-o, usa ka langyaw nga blogger nga inila sa tibuok kalibutan nitumbok sa Kawasan Falls sa Badian nga usa sa mga maanindot nga falls sa kalibutan. Inila usab ang whale watching sa Oslob ug maanindot nga beaches sa norte, labina ang Bantayan Island. Nagsugod na usab og kainila ang mga isla sa Camotes nga duawunon sa mga turista, lokal ug langyaw.
Kon moderno nga dapit ang hisgutan, dako kaayo nga metropolis ang Metro Cebu, ikaduha sa Metro Manila. Skyscrapers, dagko nga malls ug uban pang urban ug modernong pasilidad ania dinhi.
Taliwa ning tanan, nagpabilin nga sama ra og probinsya ang pagpuyo sa mga lumolupyo, basta lumad lang, nag-ilhanay gihapon.
Nagpabilin ang tradisyon sa kinabag-an sa kalungsoran ug siyudad sa lalawigan pinaagi sa abag sa Kapitolyo ubos sa pamunoan ni Gobernador Gwendolyn Garcia.
Pinaagi sa Suroy-Suroy Sugbo, ang matag lokalidad maka promote sa ilang kultura ug tradisyon, labina sa mga pagkaon ug produkto. Dako og tabang sa pagpreserbar sa kultura ug tradisyon ang mao nga mga kalihukan.
Tinuod, paspas kaayo ang paglambo sa Sugbo kay maorag mga uhong ang pagpanurok sa nagbuntaog nga mga edipisyo. Tungod sa paspas nga kalamboan, ang paghuot sa trapiko naabot na gud sa kalungsoran.
Lahi sa Metro Manila, bisan moderno na kaayo nga metropolis, Sa Cebu ma-enjoy gihapon ang iyang kabaybayunan. Kon ganahan ka magpahangin sa bukid diin adto ka mokaon o mangape, usa ra ka hangad, naa ka na sa lamian nga kan-anan ug kapehanan. Wa kinahanglanang mobiyahe ka pa og layo kaayo.
Apan gikinahanglan nga ang mga local government unit (LGU) ug mga lumolupyo manalipod ning mga bahandi nga maoy bentaha sa Sugbo itandi sa ubang mga isla sa Pilipinas.