Sa tinguha nga ma-convert ang basura ngadto sa kuryente ug mahipos ang toneladang mga basura sa Probinsya sa Sugbo, gitunol ug gi-award na sa Kagamhanan sa Probinsya sa Sugbo ang Waste to Energy Project ngadto sa usa ka consortium.
Si Cebu Governor Gwendolyn Garcia nga maoy nangulo sa Economic Enterprise Council (EEC) ni-award sa proyekto ngadto consortium sa Waste Management Incorporated (WMI) ug Harvest Waste B.V nga naka base sa Amsterdam, Netherlands.
Nidawat sa notice to award mao si Atty. Javier Flores isip representante sa consortium, ug nitambong sa kalihukan sila si Generoso Dungo ug Dutch National nga regional director sa Harvest Waste BV nga si Luuk Rietvelt subay sa taho sa Sugbo News, media arm sa Kapitolyo.
Sa milabayng tuig, una nang miduso og proposal ang consortium ug gipaubos sa mga proseso sa Kapitolyo aron maatbangan og bidder o Swiss Challenge. Apan subay sa pagbukas sa bidding giingong walay niatbang niini hinungdan sa pag-award sa maong proyekto ngadto sa naasoyng consortium.4
Ang pagpahimutang og WTE usa sa mga paagi aron dili mapuno ang mga landfill ug malikayan ang dugang emission sa carbon dioxide ug uban pang makaguba nga greenhouse gasses nga gikan sa landfills.
Sa Disyembre 5, 2022 mohimo og laing tigum ang EEC aron tukion ang uban pang mga detalye sa WTE project.